മങ്കൂഴിപ്പടി റോഡിലെ നെല്ലിമൂട് നിവാസികളുടെ ദീർഘകാല ആവശ്യമായിരുന്ന കെ എസ് ആർ റ്റി സി ബസ് റൂട്ട് അഡ്വ. വർഗീസ് മാമ്മൻ എം. എൽ. എയുടെ ഇടപെടൽ മൂലം
യാഥാർഥ്യമായി. ഇത് സംബന്ധിച്ചു മല്ലപ്പള്ളി ബ്ലോക്ക്‌ പഞ്ചായത്ത്‌ വൈസ് പ്രസിഡന്റ്‌ എബി മേക്കരിങ്ങാട്ട്, മോൻസി പ്ലാച്ചിറ, സജി മേക്കരിങ്ങാട്ട് എന്നിവർ എം എൽ എക്ക്‌ നൽകിയ നിവേദനത്തിന്റെ അടിസ്ഥാനത്തിലാണ് പുതിയ ബസ് റൂട്ട് അനുവദിച്ചത്. തിരുവല്ലയിൽ നിന്നും മല്ലപ്പള്ളിക്കുള്ള ബസിന് നെല്ലിമൂട് ജംഗ്ഷനിൽ നൽകിയ സ്വീകരണത്തിൽ ബ്ലോക്ക്‌ പഞ്ചായത്ത്‌ വൈസ് പ്രസിഡന്റ്‌ എബി മേക്കരിങ്ങാട്ട്, ബ്ലോക്ക്‌ പഞ്ചായത്ത്‌ അംഗങ്ങളായ ലൈല അലക്സാണ്ടർ, കൃഷ്ണൻകുട്ടി മുള്ളൻകുഴി, പഞ്ചായത്ത്‌ അംഗങ്ങങ്ങളായ സന്തോഷ്‌ ചാമക്കാല, ഷൈനി ഫിലിപ്പ്, നെല്ലിമൂട് പൗരസമതി പ്രസിഡന്റ്‌ മോൻസി പ്ലാച്ചിറ, സജി മേക്കരിങ്ങാട്ട്, വിജി കിഴക്കയിൽ, എബി ഞാറാക്കോടൻ, ജീമോൻ ചേറ്റേടം തുടങ്ങിയവർ പ്രസംഗിച്ചു

കേരള സർക്കാരിന്റെ നേതൃത്വത്തിൽ ആഭ്യന്തര, തദ്ദേശ സ്വയംഭരണ വകുപ്പും സംയുക്തമായി നടപ്പിലാക്കി വരുന്ന തൂഫാൻ 2.0 പദ്ധതിയുടെ ഭാഗമായി മല്ലപ്പള്ളി ബ്ലോക്ക് പഞ്ചായത്ത് പുതുശ്ശേരി എം ജി ഡി ഹൈസ്കൂളുമായി ചേർന്ന് നടത്തിയ ലഹരി വിരുദ്ധ റാലിയും, ബോധവത്കരണ ക്ലാസും ബ്ലോക്ക് പഞ്ചായത്ത്‌ പ്രസിഡന്റ്‌ ശോശാമ്മ തോമസ് ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡന്റ് എബി മെക്കരിങ്ങാട്ട് അധ്യക്ഷത വഹിച്ചു. അസിസ്റ്റൻ്റ് സബ് ഇൻസ്പെക്ടർ ഓഫ് പോലീസ് അൻസിം പി. എച്ച് കുട്ടികൾക്ക് ലഹരിവിരുദ്ധ സന്ദേശം നൽകി. യോഗത്തിൽ ആരോഗ്യ–വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ലൈലാ അലക്സാണ്ടർ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ മുഹമ്മദ് ഇസ്മായിൽ,
ബ്ലോക്ക് പഞ്ചായത്ത് അംഗങ്ങളായ സി.പി. മാത്യു, എ.ഡി ജോൺ, കൃഷ്ണൻകുട്ടി മുള്ളൻകുഴി, ബ്ലോക്ക് പഞ്ചായത്ത്‌ ജോയിൻ്റ് ബി. ഡി. ഒ അനിൽ എബ്രഹാം, സ്കൂൾ എച്ച്.എം. ഷൈനി സാമുവേൽ തുടങ്ങിയവർ പ്രസംഗിച്ചു.

റാന്നിതോട്ടമൺകാവ് ഭഗവതി ക്ഷേത്രത്തിൽ അംബായാഗത്തിന് തുടക്കമായി. പത്തുദിവസം നീളുന്ന ആത്മീയ-സാംസ്കാരിക സംഗമത്തോടനുബന്ധിച്ച് ക്ഷേത്രപരിസരത്തും സമീപത്തെ വിശാലമായ മൈതാനത്തും വിപുലമായ ഒരുക്കങ്ങളാണ് പൂർത്തിയായിരിക്കുന്നത്.
വിഗ്രഹപ്രതിഷ്ഠ, ഭദ്രദീപ പ്രജ്വലനം, ധ്വജാരോഹണം, ആചാര്യവരണം തുടങ്ങിയ ചടങ്ങുകൾ ആചാര്യന്മാരായ ബ്രഹ്മശ്രീ നാഗേരി വിഷ്ണു ആനന്ദ്, ബ്രഹ്മശ്രീ ഹരി ശങ്കർ എന്നിവരുടെ നേതൃത്വത്തിൽ നടന്നു. സപ്തശതി പാരായണത്തോടനുബന്ധിച്ച് ചണ്ഡികാഹോമവും നടന്നു. ഡോ. കെ. രാമചന്ദ്ര അഡിഗയുടെ നേതൃത്വത്തിലായിരുന്നു ഹോമം. കൊല്ലൂർ മൂകാംബിക ക്ഷേത്രത്തിലെ പ്രധാന തന്ത്രിയും ചടങ്ങുകൾക്ക് നേതൃത്വം നൽകിയത് .
വൈകിട്ട് അഞ്ചിന് സത്രാരംഭ സമ്മേളനം. ഡോ. രാമചന്ദ്രഅഡീക ഭദ്രദീപം തെളിയിച്ചു.ദേവസ്വം പ്രസിഡന്റ് അഡ്വ. ഷൈൻ ജി. കുറുപ്പ് അധ്യക്ഷത വഹിച്ചു. ദേവസ്വം സെക്രട്ടറി പി. ശ്രീകുമാർ സ്വാഗതവും. ശിവഗിരി മഠത്തിന്റെ യു.എസ്.എ. ഘടകം മഠാധിപതി ശ്രീമത് ഗുരുപ്രസാദ് സ്വാമികൾ അനുഗ്രഹപ്രഭാഷണം നടത്തി. എൻ.എസ്.എസ്. റാന്നി താലൂക്ക് യൂണിയൻ സെക്രട്ടറി കെ എൻ മഹേഷ് , റാന്നി എം.എൽ.എ അഡ്വ. പഴകുളം മധു, റാന്നി ഗ്രാമപഞ്ചായത്ത് പ്രസിഡന്റ് എന്നിവർ പങ്കെടുത്തു. ദേവസ്വം ട്രഷറർ സി.എൻ. പ്രസാദ് കൃതജ്ഞത രേഖപ്പെടുത്തി.
വൈകിട്ട് ഏഴിന് യജ്ഞാചാര്യന്റെ നേതൃത്വത്തിൽ ദേവീഭാഗവത മാഹാത്മ്യ പരിചയണം നടന്നു. രാത്രി എട്ടിന് നടന്ന കലാസന്ധ്യയിൽ ഏലൂർ ബിജുവും 51 ശിഷ്യന്മാരും നയിക്കുന്ന സോപാനസംഗീതാമൃതം അരങ്ങേറി.
അംബായാഗത്തിന്റെ ഭാഗമായി ക്ഷേത്രത്തിന്റെ പടിഞ്ഞാറുഭാഗത്തെ മൈതാനത്ത് ഒരുക്കിയിരിക്കുന്ന വ്യാപാരമേളയും അമ്യൂസ്‌മെന്റ് പാർക്കും തന്നെ പ്രവർത്തനം ആരംഭിച്ചു. വിവിധ വ്യാപാര സ്റ്റാളുകൾ, ഭക്ഷണശാലകൾ, വിനോദ സംവിധാനങ്ങൾ എന്നിവയോടെ കുടുംബങ്ങൾക്കും കുട്ടികൾക്കും ഒരുമിച്ച് സമയം ചെലവഴിക്കാവുന്ന ഇടമായാണ് മേള ഒരുക്കിയിരിക്കുന്നത്.
ആത്മീയ ചടങ്ങുകൾക്കൊപ്പം വ്യാപാരം, വിനോദം, കലാ-സാംസ്കാരിക പരിപാടികൾ എന്നിവയും ഒരുമിക്കുന്ന അംബായാഗം റാന്നിയുടെ പൊതുജീവിതത്തിൽ ശ്രദ്ധേയമായ കൂട്ടായ്മയായി മാറുമെന്നാണ് സംഘാടകരുടെ പ്രതീക്ഷ.
ഒക്ടോബർ 9 മുതൽ 18 വരെ തോട്ടമൺകാവ് ദേവീക്ഷേത്രത്തിൽ നടക്കുന്ന അംബായാഗത്തിലേക്ക് ഭക്തജനങ്ങളെയും കുടുംബങ്ങളെയും പൊതുജനങ്ങളെയും ക്ഷേത്രത്തിലേക്ക് സ്വാഗതം ചെയ്യുന്നു .

ലോക മാനസികാരോഗ്യ ദിനാചരണത്തിന്റെ ഭാഗമായി കേരള ഗവൺമെന്റ് മെഡിക്കൽ ഓഫീസേഴ്സ് അസോസിയേഷൻ (കെ.ജി.എം.ഒ.എ.) പത്തനംതിട്ട ജില്ലാ കമ്മിറ്റിയുടെ ആഭിമുഖ്യത്തിൽ റാന്നി എം.എസ്. ഹയർ സെക്കൻഡറി സ്കൂളുമായി സഹകരിച്ച് ‘തൂഫാൻ’ ലഹരി വിരുദ്ധ ബോധവൽക്കരണ ക്ലാസുകളുടെ ജില്ലാതല ഉദ്ഘാടനം റാന്നി എം.എൽ.എ. അഡ്വ. പഴകുളം മധു നിർവഹിച്ചു.
മനുഷ്യന്റെ സമഗ്ര ആരോഗ്യത്തിൽ മാനസികാരോഗ്യത്തിന് വളരെ പ്രധാനപ്പെട്ട സ്ഥാനമാണുള്ളതെന്ന് എം.എൽ.എ. പറഞ്ഞു. ലഹരി വസ്തുക്കളുടെ ഉപയോഗം മാനസികാരോഗ്യത്തെ ഗുരുതരമായി ബാധിക്കുന്ന സാഹചര്യത്തിൽ വിദ്യാർത്ഥികളിലും യുവാക്കളിലും ലഹരിക്കെതിരെ ശക്തമായ ബോധവൽക്കരണം അനിവാര്യമാണെന്നും അദ്ദേഹം അഭിപ്രായപ്പെട്ടു. ആരോഗ്യകരമായ ജീവിതശൈലിയും ലഹരിമുക്തമായ സമൂഹവും ഉറപ്പാക്കുന്നതിന് വിദ്യാർത്ഥികളുടെ പങ്കാളിത്തം നിർണായകമാണെന്നും അദ്ദേഹം കൂട്ടിച്ചേർത്തു.
കെ.ജി.എം.ഒ.എ. ജില്ലാ പ്രസിഡന്റ് ഡോ. പ്രവീൺ കുമാർ അധ്യക്ഷത വഹിച്ചു. ഡോ. ബോബി ചെറിയാൻ ലഹരി വിരുദ്ധ ബോധവൽക്കരണ ക്ലാസിന് നേതൃത്വം നൽകി.
സ്കൂൾ പ്രിൻസിപ്പൽ സ്മിജു ജേക്കബ്, ഡോ. ജ്യോതിന്ദ്രൻ, ഡോ. എൽവിൻ, ഡോ. ജെയ്സൺ, റാന്നി താലൂക്ക് ആശുപത്രി ആർ.എം.ഒ. ഡോ. അഞ്ജന എസ്., ഡോ. നിതിൻ സൂതൻ, സ്മിത സ്കറിയ എന്നിവർ പ്രസംഗിച്ചു.
പരിപാടിയുടെ ഭാഗമായി വിദ്യാർത്ഥികൾ അവതരിപ്പിച്ച നൃത്തശിൽപവും അരങ്ങേറി.

വോട്ടവകാശം സംരക്ഷിക്കുന്നതിനായി നടത്തിവരുന്ന സമരത്തിന് നേതൃത്വം നൽകിയ പ്രതിപക്ഷ നേതാവ് രാഹുൽ ഗാന്ധിയേയും, പ്രിയങ്കാ ഗാന്ധി എം പിയേയും, കെസി വേണുഗോപാൽ എംപി യേയും അകാരണമായി അറസ്റ്റുചെയ്തതിൽ പ്രതിഷേധിക്കാൻ കെ പി സി സി യുടെ ആഹ്വാന പ്രകാരം കല്ലൂപ്പാറ മണഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും യോഗവും നടത്തി
മണ്ഡലം പ്രസിഡണ്ട് ചെറിയാൻ മണ്ണഞ്ചേരി അദ്ധ്യക്ഷത വഹിച്ചു
കോൺഗ്രസ് ബ്ലോക്ക് പ്രസിഡണ്ട് എബി മേക്കരിങ്ങാട്ട് ഉത്ഘാടനം ചെയ്തു. പഞ്ചായത്ത് പ്രസിഡണ്ട് ജ്ഞാനമണി മോഹൻ, സി പി മാത്യു, അനിൽ തോമസ്സ് , റെജി ചാക്കോ, അമ്പിളി പ്രസാദ്, റ്റിജു തോമസ്, ശോശാമ്മ ജോർജ്, എം ഓ എബ്രഹാം,ഷിജി ജോർജ്, സനീഷ് അടവിക്കൽ, റ്റിബി സൂസൻ മാത്യു, സുനിൽ കൊച്ചേരി, സണ്ണി കടമണ്ണിൽ തുടങ്ങിയവർ പ്രസംഗിച്ചു.

റാന്നി സെന്റ് തോമസ് കോളേജ് യൂണിയൻ ഭാരവാഹികൾ സത്യപ്രതിജ്ഞ ചെയ്ത് ഔദ്യോഗികമായി ചുമതലയേറ്റു. കോളേജ് പ്രിൻസിപ്പാൾ സ്നേഹ എൽസി ജേക്കബ്, യൂണിയൻ അഡ്വൈസർ രെഞ്ചു തുടങ്ങിയവർ ചടങ്ങിൽ പങ്കെടുത്തു.
ബിബിൻ ബിജു ചെയർമാനായും ജിസ്നമോൾ വൈസ് ചെയർപേഴ്സണായും രാഖിമോൾ പി. ജെ. ജനറൽ സെക്രട്ടറിയായും ചുമതലയേറ്റു.
അഭിഷേക് സാം രാജൻ ആർട്സ് ക്ലബ് സെക്രട്ടറിയായും അഭിൻ ബിജു മാഗസിൻ എഡിറ്ററായും കെ. എസ്. അഭിരാജ് യൂണിവേഴ്സിറ്റി യൂണിയൻ കൗൺസിലറായും സത്യപ്രതിജ്ഞ ചെയ്തു.
അഞ്ജന വിജയ് ഒന്നാം വർഷ പ്രതിനിധിയായും ഗംഗ രാജീവ്, ശ്രേയ എന്നിവർ ലേഡി റെപ്രസന്റേറ്റീവുമാരായും ചുമതലയേറ്റു.
വിദ്യാർത്ഥികളുടെ വിവിധ ആവശ്യങ്ങളിൽ ഇടപെട്ടും അക്കാദമിക, കലാ-കായിക പ്രവർത്തനങ്ങൾക്ക് നേതൃത്വം നൽകിയും കോളേജ് ക്യാമ്പസിന്റെ പുരോഗതിക്കായി പ്രവർത്തിക്കുകയാണ് പുതിയ യൂണിയന്റെ ലക്ഷ്യം.

പെരുനാട് പോലീസ് സ്റ്റേഷൻ പരിധിയിൽ വടശ്ശേരിക്കര മണിയാറ്റ് പ്ലാസയ്ക്ക് സമീപം ഫ്രൂട്ട് സ്റ്റാളിൽ മോഷണം നടത്തിയ പ്രതിയെ പെരുനാട് പോലീസ് പിടികൂടി.
കോട്ടയം എരുമേലി സ്വദേശി എരുതുവാ പുഴ അണിയറ ഹൗസിൽ സുമേഷ് മോഹനൻ (31) ആണ് പെരിനാട് പോലീസിന്റെ പിടിയിലായത്. തിങ്കളാഴ്ച രാത്രിആണ് വടശ്ശേരിക്കരയിലെ ഫ്രൂട്സ് കടയിൽനിന്ന് ഇയാൾ 22,500 രൂപയും സിസിടിവിയുടെ വൈഫൈ മോഡവും , വാച്ച് , ബ്ലൂടൂത്ത് സ്പീക്കർ , ഒരു കത്തി എന്നിവ മോഷ്ടിച്ച് കടന്നത്.
മോഷണം നടന്ന സ്ഥലത്തുനിന്നും പ്രതിയുമായി ബന്ധിപ്പിക്കാവുന്ന തരത്തിലുള്ള ചില സൂചനകൾ പോലീസിന് ലഭിച്ചതാണ് വളരെ വേഗം പ്രതിയെ കണ്ടെത്താൻ പോലീസിന് സഹായകമായത്.പെരുനാട് പോലീസ് സ്റ്റേഷൻ സബ് ഇൻസ്പെക്ടർ എസ് എ ഒ മിഥുൻ അശോക് , എസ് സി പി ഒ വിജേഷ്, സി പി ഒ മാരായ അക്ഷയ് വേണു , അരുൺ എ എസ് എന്നിവർ അടങ്ങിയ സംഘമാണ് പ്രതിയെ എരുമേലിയിൽ നിന്നും പിടികൂടിയത്. പ്രതി കോട്ടയം ജില്ലയിലെ എരുമേലി , കാഞ്ഞിരപ്പള്ളി , കോട്ടയം വെസ്റ്റ് തുടങ്ങിയ പോലീസ് സ്റ്റേഷനുകളിലും മോഷണ കേസുകളിലെ പ്രതിയും ജയിൽ ശിക്ഷ അനുഭവിച്ചിട്ടുള്ള ആളുമാണ് എന്ന് പോലീസ് പറഞ്ഞു. റാന്നി ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു

പട്ടികജാതി വിഭാഗക്കാര്‍ക്ക് സേഫ് പദ്ധതിയിലേക്ക് അപേക്ഷിക്കാം

പട്ടികജാതി വിഭാഗക്കാരുടെ ഭവന പൂര്‍ത്തീകരണവും പുനരുദ്ധാരണവും ലക്ഷ്യമിട്ടുള്ള സേഫ് (സെക്യുര്‍ അക്കോമഡേഷന്‍ ആന്റ് ഫെസിലിറ്റി എന്‍ഹാന്‍സ്‌മെന്റ്) പദ്ധതിയിലേക്ക് ഒക്ടോബര്‍ 31 വരെ അപേക്ഷിക്കാം. ഒരു വീടിന് പരമാവധി രണ്ടു ലക്ഷം രൂപ വരെ ഗഡുക്കളായി സഹായം ലഭിക്കും. ഒരു ലക്ഷം രൂപയാണ് ഗുണഭോക്താവിന്റെ വരുമാന പരിധി. 2006 ഏപ്രില്‍ ഒന്നിന് ശേഷം പൂര്‍ത്തിയാക്കിയിട്ടുള്ള 1000 ചതുരശ്ര അടി വരെ വിസ്തീര്‍ണമുള്ള വീടുകള്‍ ഉള്ള കുടുംബങ്ങള്‍ക്കാണ് പദ്ധതി. കഴിഞ്ഞ അഞ്ച് വര്‍ഷത്തിനുള്ളില്‍ ഭവന നിര്‍മാണത്തിനോ പുനരുദ്ധാരണത്തിനോ പൂര്‍ത്തീകരണത്തിനോ സര്‍ക്കാര്‍ ധനസഹായം ലഭിച്ചവരെയും മുന്‍ വര്‍ഷങ്ങളില്‍ അനുവദിച്ച ധനസഹായത്തിന്റെ അവസാന ഗഡു അഞ്ച് വര്‍ഷത്തിനുള്ളില്‍ കൈപ്പറ്റിയവരെയും പരിഗണിക്കില്ല. മൂന്നു ഗഡുക്കളായാണ് തുക വിതരണം. മേല്‍ക്കൂര പൂര്‍ത്തീകരണം, ശുചിത്വ ടോയ്‌ലറ്റ് നിര്‍മാണം, ഭിത്തികള്‍ ബലപ്പെടുത്തല്‍, വാതിലുകളും ജനലുകളും സ്ഥാപിക്കല്‍, അടുക്കള നവീകരണം, ഫ്‌ളോറിംഗ് ടൈല്‍ പാകല്‍, സമ്പൂര്‍ണ പ്ലാസ്റ്ററിംഗ്, വൈറ്റ് വാഷ്, ചുവര്‍ പെയിന്റ്ിംഗ്, ഇലക്ട്രിക്കല്‍ വയറിംഗ്, പ്ലംബിംഗ് എന്നീ നിര്‍മാണ ഘടകങ്ങളാണ് പദ്ധതിയില്‍ ഉള്‍പ്പെടുത്തിയിരിക്കുന്നത്. പദ്ധതിക്ക് ആകെ അനുവദിക്കുന്ന രണ്ട് ലക്ഷം രൂപയില്‍ ഒന്നാം ഗഡു 50,000 രൂപയും രണ്ടാം ഗഡു 1,00,000 രൂപയും മൂന്നാം ഗഡു 50,000 രൂപയും ആണ്. ഗുണഭോക്താവിന്റെ ബാങ്ക് അക്കൗണ്ടിലേക്കാണ് തുക നല്‍കുന്നത്. വീടിന്റെ മേല്‍ക്കൂര പൂര്‍ത്തിയാക്കാത്തതിനാല്‍ നാലാം ഗഡു കിട്ടാത്തവര്‍ക്ക് കോണ്‍ക്രീറ്റ് ചെയ്യാന്‍ തുക അനുവദിക്കും. തുടര്‍ന്ന് നാലാം ഗഡു ലഭിക്കുമ്പോള്‍ മുഴുവന്‍ പ്രവൃത്തികളും പൂര്‍ത്തിയാക്കണം. മേല്‍ക്കൂര ഷീറ്റിട്ടവര്‍ക്ക് പകരം കോണ്‍ക്രീറ്റു ചെയ്യാനും തുക അനുവദിക്കും. മേല്‍ക്കൂരയും ശൗചാലയവും ഇല്ലാത്ത, പൂര്‍ത്തിയാക്കാത്ത കുടുംബങ്ങള്‍, വനിതകള്‍ മാത്രമുള്ള കുടുംബം, ഭിന്നശേഷിക്കാര്‍, മാരകരോഗങ്ങള്‍ ബാധിച്ചവര്‍, വിധവകള്‍ തുടങ്ങിയ 10 മാനദണ്ഡങ്ങള്‍ക്ക് അനുസൃതമായാണ് അര്‍ഹരായവരെ കണ്ടെത്തുന്നത്. സര്‍ക്കാര്‍ സഹായത്തോടെയും സ്വന്തം നിലയ്ക്കും നിര്‍മിച്ച് പൂര്‍ത്തിയാക്കാത്ത വീടുകള്‍ക്കും സഹായം ലഭിക്കും. അപേക്ഷകര്‍ ബ്ലോക്ക്, നഗരസഭ, കോര്‍പ്പറേഷന്‍ പട്ടികജാതി വികസന ഓഫീസുകളില്‍ അപേക്ഷ സമര്‍പ്പിക്കണം. അപേക്ഷ ഫോമിനും വിവരങ്ങള്‍ക്കും ബ്ലോക്ക്, ജില്ല പട്ടികജാതി വികസന ഓഫീസുമായി ബന്ധപ്പെടണം. ഫോണ്‍: 0468 2322712.

ജൂനിയര്‍ ഇന്‍സ്ട്രക്ടര്‍ നിയമനം

ചെന്നീര്‍ക്കര സര്‍ക്കാര്‍ ഐ.ടി.ഐയില്‍ ജൂനിയര്‍ ഇന്‍സ്ട്രക്ടര്‍ (ഇലക്ട്രിഷ്യന്‍) തസ്തികയിലെ ഒരു ഒഴിവില്‍ ഓപ്പണ്‍ വിഭാഗത്തില്‍ നിന്ന് ഗസ്റ്റ് ഇന്‍സ്ട്രക്ടര്‍ നിയമനം നടത്തുന്നു. യോഗ്യത: ഇലക്ട്രിഷ്യന്‍ ട്രേഡില്‍ എന്‍.ടി.സി യും മൂന്ന് വര്‍ഷത്തെ പ്രവൃത്തി പരിചയവും അല്ലെങ്കില്‍ എന്‍.എ.സി യും ഒരു വര്‍ഷത്തെ പ്രവൃത്തി പരിചയവും അല്ലെങ്കില്‍ ഇലക്ട്രിക്കല്‍/ഇലക്ട്രിക്കല്‍ ആന്റ് ഇലക്ട്രോണിക്സ് എഞ്ചിനീയറിംഗില്‍ മൂന്ന് വര്‍ഷത്തെ ഡിപ്ലോമയും അല്ലെങ്കില്‍ ഇലക്ട്രിക്കല്‍/ഇലക്ട്രിക്കല്‍ ആന്റ് ഇലക്ട്രോണിക്‌സ്/പവര്‍ ഇലക്ട്രോണിക്സ് ആന്റ് പവര്‍ സിസ്റ്റംസ് എഞ്ചിനീയറിംഗില്‍ ബിരുദം/തത്തുല്യം. ബന്ധപ്പെട്ട ട്രേഡില്‍ ക്രാഫ്റ്റ് ഇന്‍സ്ട്രക്ടര്‍ സര്‍ട്ടിഫിക്കറ്റുളള ഉദ്യോഗാര്‍ഥികള്‍ക്ക് മുന്‍ഗണന. സ്വകാര്യ സ്ഥാപനങ്ങളില്‍ നിന്നുള്ള തൊഴില്‍ പരിചയ സര്‍ട്ടിഫിക്കറ്റുകള്‍ പി.എസ്.സിയില്‍ സമര്‍പ്പിക്കുന്ന മാതൃകയിലുള്ളതായിരിക്കണം. അഭിമുഖത്തിന് ഹാജരാക്കുന്ന യോഗ്യത സര്‍ട്ടിഫിക്കറ്റില്‍ രേഖപ്പെടുത്തിയിരിക്കുന്ന പേരും ജനന തീയതിയും ആധാര്‍ കാര്‍ഡിലെ പോലെയാണെന്ന് ഉദ്യോഗാര്‍ഥി ഉറപ്പാക്കണം. അസല്‍ സര്‍ട്ടിഫിക്കറ്റുകളും ജാതി സര്‍ട്ടിഫിക്കറ്റും ആധാര്‍ കാര്‍ഡും പകര്‍പ്പുകളുമായി ഒക്ടോബര്‍ 16 രാവിലെ 10 ന് ഐ.ടി.ഐയില്‍ അഭിമുഖത്തിന് ഹാജരാകണം. ഫോണ്‍: 0468 2258710.

വയര്‍മാന്‍ പരിശീലനം

വയര്‍മാന്‍ പരീക്ഷ 2025 ല്‍ വിജയിച്ചവര്‍ക്ക് പെര്‍മിറ്റ് ലഭിക്കുന്നതിനായി ഒക്ടോബര്‍ 15 രാവിലെ 10 മുതല്‍ പത്തനംതിട്ട ജില്ല ഇലക്ട്രിക്കല്‍ ഇന്‍സ്‌പെക്ടറുടെ ഓഫീസില്‍ ഏകദിന പരിശീലന പരിപാടി നടത്തും. വിവരങ്ങള്‍ക്ക് ഓഫീസുമായി ബന്ധപ്പെടണം. ഇ-മെയില്‍ : eipta2014@gmail.com . ഫോണ്‍: 0468 2223123.

ആശ വര്‍ക്കര്‍ നിയമനം

വള്ളിക്കോട് ഗ്രാമപഞ്ചായത്തിലെ വാര്‍ഡ് 14 ല്‍ ആശ വര്‍ക്കറുടെ ഒഴിവിലേക്ക ് വള്ളിക്കോട് പ്രാഥമിക ആരോഗ്യ കേന്ദ്രത്തില്‍ ഒക്ടോബര്‍ 15 ഉച്ചയ്ക്ക് രണ്ടിന് അഭിമുഖം നടത്തും. യോഗ്യത: പത്താം ക്ലാസ് വിജയം, വാര്‍ഡ് പരിധിയില്‍ സ്ഥിരതാമസക്കാരായിരിക്കണം. 25 നും 45 നും ഇടയില്‍ പ്രായമുള്ള വിവാഹിതര്‍ക്ക് അപേക്ഷിക്കാം. ബന്ധപ്പെട്ട രേഖകള്‍ സഹിതം ഒക്ടോബര്‍ 14 വൈകിട്ട് നാലിനു മുമ്പ് പ്രാഥമിക ആരോഗ്യ കേന്ദ്രത്തില്‍ നേരിട്ട് അപേക്ഷ സമര്‍പ്പിക്കണം. ഫോണ്‍: 0468 2350229.

പ്രവേശനം

കുളക്കട അസാപ് കേരള കമ്മ്യൂണിറ്റി സ്‌കില്‍ പാര്‍ക്കില്‍ എസന്‍ഷ്യല്‍ ഇംഗ്ലീഷ് ആന്റ് സോഫ്റ്റ് സ്‌കില്‍സ്, ഡിജിറ്റല്‍ മാര്‍ക്കറ്റിംഗ്, ജനറല്‍ ഫിറ്റ്‌നസ് ട്രെയിനര്‍ കോഴ്സുകളില്‍ പ്രവേശനം ആരംഭിച്ചു. ഫോണ്‍: 9495999672, 6238984094.

ക്വട്ടേഷന്‍ ക്ഷണിച്ചു

പത്തനംതിട്ട ജനറല്‍ ആശുപത്രിയില്‍ ഒക്ടോബര്‍ 26 മുതല്‍ 2027 ഒക്ടോബര്‍ 25 വരെ ഉണ്ടായേക്കാവുന്ന പാഴ്കടലാസ്, പാഴ് പ്ലാസ്റ്റിക്, കാര്‍ഡ് ബോര്‍ഡ്, കുടിവെള്ള കുപ്പികള്‍ എന്നിവ ശേഖരിച്ച് ഏറ്റെടുക്കുന്നതിന് ക്വട്ടേഷന്‍ ക്ഷണിച്ചു. അവസാന തീയതി ഒക്ടോബര്‍ 23 രാവിലെ 11. ഫോണ്‍: 0468 2222364.

താല്‍ക്കാലിക നിയമനം

തിരുവല്ല വിദ്യാഭ്യാസ ജില്ലയുടെ പരിധിയിലുള്ള വായ്പൂര്‍ എം.ആര്‍.എസ്.എല്‍.ബി.വി.ജി.എച്ച്.എസ്.എസ് ല്‍ എച്ച്.എസ്.ടി മലയാളം തസ്തികയില്‍ ദിവസവേതന അടിസ്ഥാനത്തില്‍ നിയമനം നടത്തും. ഉദ്യോഗാര്‍ഥികള്‍ യോഗ്യത സര്‍ട്ടിഫിക്കറ്റുകളുടെ അസല്‍ സഹിതം ഒക്ടോബര്‍ 14 രാവിലെ 11.30 ന് സ്‌കൂളില്‍ അഭിമുഖത്തിന് ഹാജരാകണം. ഫോണ്‍: 8590345579.

ഡേറ്റ എന്‍ട്രി ഓപ്പറേറ്റര്‍ നിയമനം

പട്ടികവര്‍ഗ വികസന വകുപ്പിനു കീഴില്‍ റാന്നി ട്രൈബല്‍ ഡെവലപ്‌മെന്റ് ഓഫീസ്, റാന്നി ട്രൈബല്‍ എക്സ്റ്റന്‍ഷന്‍ ഓഫീസ് എന്നിവിടങ്ങളില്‍ പ്രവര്‍ത്തിക്കുന്ന സഹായി കേന്ദ്രത്തിലേക്ക് ഡേറ്റ എന്‍ട്രി ഓപ്പറേറ്റര്‍മാരെ തിരഞ്ഞെടുക്കുന്നു. 20 നും 35 നും മദ്ധ്യേ പ്രായമുള്ള പട്ടികവര്‍ഗ വിഭാഗക്കാര്‍ക്ക് അപേക്ഷിക്കാം. യോഗ്യത: സര്‍ക്കാര്‍ അംഗീകൃത സ്ഥാപനത്തില്‍ നിന്നുള്ള കമ്പ്യൂട്ടര്‍ കോഴ്സ് വിജയം, മലയാളം, ഇംഗ്ലീഷ് ടൈപ്പിംഗ് പരിജ്ഞാനം. ഡി.സി.എ, ഡി.ടി.പി, പി.ജി.ഡി.സി.എ കോഴ്സുകള്‍ കഴിഞ്ഞവര്‍ക്ക് മുന്‍ഗണന. പ്രതിമാസ ഓണറേറിയം 16,000 രൂപ. ഉദ്യോഗാര്‍ഥികള്‍ അപേക്ഷ, ജാതി സര്‍ട്ടിഫിക്കറ്റ്, പ്രായം, വിദ്യാഭ്യാസ യോഗ്യത തെളിയിക്കുന്ന സര്‍ട്ടിഫിക്കറ്റ്, ആധാര്‍ കാര്‍ഡ് എന്നിവയുടെ അസല്‍ സഹിതം ഒക്ടോബര്‍ 13 രാവിലെ 11 ന് റാന്നി മിനി സിവില്‍ സ്റ്റേഷനില്‍ മൂന്നാം നിലയില്‍ പ്രവര്‍ത്തിക്കുന്ന റാന്നി ട്രൈബല്‍ ഡെവലപ്‌മെന്റ് ഓഫീസില്‍ അഭിമുഖത്തിന് ഹാജരാകണം. ഫോണ്‍: 0473 5227703.

ട്രെയിനി സ്റ്റാഫ് നിയമനം
 
പത്തനംതിട്ട ജില്ലയിലെ വിവിധ സര്‍ക്കാര്‍ ആശുപത്രികളില്‍ ഇ-ഹെല്‍ത്ത് കേരള പ്രോജക്ടിലേക്ക് ‘ട്രെയിനി സ്റ്റാഫ്’ തസ്തികയില്‍ താല്‍ക്കാലിക അടിസ്ഥാനത്തില്‍ നിയമനം നടത്തുന്നു. യോഗ്യത: മൂന്ന് വര്‍ഷ ഡിപ്ലോമ /ബി. ടെക് ഇന്‍ ഇ.സി.ഇ, ഇ.ഇ.ഇ, സി.എസ്, ഐ.ടി, എം.സി.എ, ഹാര്‍ഡ്വെയര്‍ ആന്റ് നെറ്റ്വര്‍ക്കിങ്ങില്‍ ഒരു വര്‍ഷത്തെ പ്രവൃത്തി പരിചയം, ആശുപത്രി മാനേജ്‌മെന്റ് സോഫ്റ്റ്‌വെയര്‍ ആന്റ് ഇംപ്ലിമെന്റേഷനില്‍ പ്രവൃത്തി പരിചയം അഭികാമ്യം. പ്രതിമാസ വേതനം 10,000 രൂപ. പ്രായപരിധി 18 -35. https://forms.gle/LkedoQBmbYmb2LjP6   ല്‍ അപേക്ഷ സമര്‍പ്പിക്കണം. അപേക്ഷ സമര്‍പ്പിക്കേണ്ട അവസാന തീയതി ഒക്ടോബര്‍ 20 വൈകിട്ട് അഞ്ച്. അഭിമുഖം ജില്ല മെഡിക്കല്‍ ഓഫീസില്‍ (ആരോഗ്യം) ഒക്ടോബര്‍ 23 രാവിലെ 09.30 മുതല്‍.    ഫോണ്‍:    9495981763

ശബരിമല ദർശനത്തിനെത്തിയ അയ്യപ്പഭക്തരുടെ നഷ്ടപ്പെട്ട ഫോണുകൾ വീണ്ടെടുക്കുന്നതിനായി സെപ്റ്റംബർ മാസം നടത്തിയ സ്പെഷ്യൽ ഡ്രൈവിൽ 8 സംസ്ഥാനങ്ങളിൽ നിന്നായി 70 ലധികം ഫോണുകൾ പമ്പ പോലീസ് കണ്ടെത്തി.
CEIR പോർട്ടൽ വഴി രജിസ്റ്റർ ചെയ്തു ബ്ലോക്ക് ചെയ്തിരുന്ന ഫോണുകൾ ഉപയോഗിച്ചിരുന്ന ആളുകളെ ഫോൺ വഴി ബന്ധപ്പെട്ടും, നോട്ടീസ് നൽകിയും വിവിധ സംസ്ഥാനങ്ങളിൽ നിന്ന് പമ്പ പോലീസ് സ്റ്റേഷനിൽ എത്തിച്ചശേഷം ഉടമസ്ഥന് പാഴ്സലായി അയച്ചു കൊടുക്കുന്നതിനുള്ള നടപടികൾ സ്വീകരിച്ചു വരുന്നു. 10 ലക്ഷത്തിലധികം മൂല്യമുള്ള ഫോണുകളാണ് ഇതുവരെ കണ്ടെത്തിയിട്ടുള്ളത്.പത്തനംതിട്ട ജില്ലാ പോലീസ് മേധാവി R ആനന്ദ് ന്റെ നിർദ്ദേശപ്രകാരം പത്തനംതിട്ട സൈബർ പോലീസ് ഉദ്യോഗസ്ഥരും പമ്പ പോലീസ് ഇൻസ്പെക്ടർ സി. കെ. മനോജിന്റെ നേതൃത്വത്തിൽ സ്റ്റേഷനിലെ ഇരുപതിലധികം പോലീസ് ഉദ്യോഗസ്ഥരും ചേർന്നാണ് ഈ നേട്ടം കൈവരിച്ചത്.

ക്രിമിനൽ സംഘത്തിലെ പ്രധാനിയുടെ ഭാര്യയോട് മോശമായി സംസാരിച്ചെന്ന് ആരോപിച്ച് പന്തളം തുമ്പമണിൽ നിന്ന് യുവാവിനെ തട്ടിക്കൊണ്ടുപോയി
ക്രൂരമായി മർദ്ദിച്ച കേസിലെ പ്രതികൾ പന്തളം പോലീസിന്റെ പിടിയിലായി.
ഇലവുംതിട്ട മുട്ടത്തുകോണം സ്വദേശി രാമൻചിറ തടത്തിവിളയിൽ വീട്ടിൽ ദീപക് ജോയ് ( 25 ), പ്രക്കാനം ചെന്നീർക്കര കാഞ്ഞിരം നിൽക്കുന്നതിൽ വീട്ടിൽ സജു സജി (24) , പ്രക്കാനം കൈപ്പിലാൽ പാറമേലേതിൽ ജോമോൻ മാത്യു (30), ഇലവുംതിട്ട നെടിയകാല കോട്ടൂർ പാറ തടത്തിൽ വീട്ടിൽ അഭിജിത്ത് സജി (21) എന്നിവരെയാണ് പന്തളം പോലീസ് അതിസാഹസികമായി പിടികൂടിയത്.
തുമ്പമൺ സ്വദേശി അജയൻ എന്ന യുവാവിനെയാണ് പ്രതികൾ സംഘം ചേർന്ന് തട്ടിക്കൊണ്ടുപോയി മർദ്ദിച്ചത്. കഴിഞ്ഞമാസം 26ന് രാത്രി ഒരുമണിയോടെ വീട്ടിൽ നിന്നും വിളിച്ചിറക്കി ബൈക്കിൽ കയറ്റി കൊണ്ടുപോവുകയായിരുന്നു. ഉണർന്നുവന്ന് കാര്യം അന്വേഷിച്ച അജയന്റെ ഭാര്യയോട് ഇയാൾ ജോലി ചെയ്യുന്ന ഫാമിൽ ഒരാവശ്യമുണ്ടെന്ന് സംഘത്തിലെ ദീപക് എന്നയാൾ പറഞ്ഞിരുന്നു. ബൈക്കിൽ കയറ്റി കൊണ്ടു പോയശേഷം തുമ്പമൺ ജംഗ്ഷനിൽ വച്ച് മറ്റൊരു കാറിലേക്ക് ബലമായി പിടിച്ചു കയറ്റി ഒന്നാം പ്രതിയുടെ വീട്ടിലെത്തിക്കുകയായിരുന്നു.അവിടെ വച്ചായിരുന്നു ക്രൂരമായ മർദ്ദനം. വെള്ളം നിറച്ച സിറിഞ്ചുകൾ ശരീരത്തിൽ കുത്തിയിറക്കുകയും, മാരകായുധങ്ങൾ ഉപയോഗിച്ച് തല്ലിച്ചതക്കുകയും ചെയ്തു. മണിക്കൂറുകളോളം ഇവർ യുവാവിനെ മർദ്ദിച്ചു. ദീപക് ആയിരുന്നു ഏറ്റവും കൂടുതൽ ഉപദ്രവിച്ചത് എന്ന് യുവാവ് പരാതിയിൽ പറയുന്നു. ക്രൂര മർദ്ദനത്തിനുശേഷം,പ്രതിയായ ദീപക്കിന്റെ വീട്ടിൽ മർദ്ദനമേറ്റ അജയൻ രാത്രി അതിക്രമിച്ചു കയറിയരീതിയിൽ വീഡിയോ ചിത്രീകരിക്കുകയും ചെയ്തിരുന്നു. അവശനിലയിലായ യുവാവിനെ ഇവർ വഴിയിൽ ഉപേക്ഷിക്കുകയായിരുന്നു. പരാതിപ്പെട്ടാൽ കുടുംബത്തെ ആകെ അപായപ്പെടുത്തുമെന്ന് അജയനെ ഭീഷണിപ്പെടുത്തിയിരുന്നു. പ്രധാന പ്രതിയായ ദീപക്ക് നാല് മാസംമുമ്പ് ജയിലിൽ ആയിരുന്ന സമയം ഇയാളുടെ ഭാര്യയോട് അജയൻ മോശമായി സംസാരിച്ചതിൻ്റെ പ്രതികാരത്തിലാണ് തട്ടിക്കൊണ്ടുപോയി ക്രൂരമായി പീഡിപ്പിച്ചത്. അജയന് ദീപക്കിനെ മാത്രമേ കണ്ട് പരിചയമുണ്ടായിരുന്നുള്ളു.അജയൻ്റെ പരാതിയിൽ പന്തളം പോലീസ് കേസ് രജിസ്റ്റർ ചെയ്യുകയും പത്തനംതിട്ട ജില്ലാ പോലീസ് മേധാവി ആർ ആനന്ദ് ൻ്റെ നിർദ്ദേശപ്രകാരം പ്രതികളെ പിടികൂടുന്നതിനായി പ്രത്യേക അന്വേഷണസംഘത്തെ നിയോഗിക്കുകയും ചെയ്തിരുന്നു. പന്തളം സിഐ ബാബു കുറുപ്പിൻ്റെ മേൽനോട്ടത്തിൽ പന്തളം എസ്എച്ച് ഒ എബിൻ പ്രസാദ് ,സിവിൽ പോലീസ് ഓഫീസർമാരായ എസ് അൻവർഷ, കൃഷ്ണലാൽ, ബി അരുൺ, ഒ അഖിൽ, വിജയ്, അനുപ എന്നിവരടങ്ങിയ അന്വേഷണസംഘമാണ് പ്രതികളെ പിടികൂടിയത്. ഇടുക്കി ചെറുതോണിയിൽ ഒളിവിൽ കഴിയുകയായിരുന്ന ദീപക്കിനെ അവിടെയെത്തി അതിസാഹസികമായി പന്തളം പോലീസ് കീഴടക്കുകയായിരുന്നു.
ദീപക്കിനെ ചോദ്യം ചെയ്തതിൽ നിന്നാണ് മറ്റു പ്രതികളെ തിരിച്ചറിഞ്ഞത്. പ്രക്കാനത്തെ പ്രതികളിൽ ഒരാളുടെ വീട്ടിൽ ഒളിച്ചു കഴിയുന്നതിനിടെയാണ് ബാക്കി മൂവരേയും പിടികൂടിയത്. കൂടുതൽ പേർ കൃത്യത്തിൽ ഉൾപ്പെട്ടിട്ടുണ്ടോ എന്ന കാര്യം പോലീസ് പരിശോധിച്ചു വരികയാണ്. പിടിയിലായവർ മറ്റ് നിരവധി ക്രിമിനൽ കേസുകളിലും പ്രതികളാണ്. കോടതിയിൽ ഹാജരാക്കിയ നാല് പ്രതികളെയും റിമാൻഡ് ചെയ്തു.