റാന്നി എബനേസർ ഹയർ സെക്കണ്ടറി സ്കൂളിലെ സ്റ്റുഡന്റ് പോലീസ് കേഡറ്റ് യൂണിറ്റിന്റെ നേതൃത്വത്തിൽ ആരംഭിച്ച ‘ദി ഹോണസ്റ്റി ഷോപ്പ്’ എന്ന സംരംഭത്തിന്റെ ഉദ്ഘാടനം ജില്ലാ പഞ്ചായത്ത് അംഗം . ആരോൺ ബിജിലി പനവേലിൽ നിർവഹിച്ചു.
റാന്നിയിലെ വിവിധ സ്കൂളുകൾ സന്ദർശിച്ചിട്ടുണ്ടെങ്കിലും ഇത്തരമൊരു സംരംഭം ആദ്യമായാണ് കാണുന്നതെന്ന് അദ്ദേഹം അഭിപ്രായപ്പെട്ടു. വിദ്യാർത്ഥികളിൽ സത്യസന്ധത, ഉത്തരവാദിത്വബോധം, പരസ്പരവിശ്വാസം എന്നീ മൂല്യങ്ങൾ വളർത്താൻ ഈ സംരംഭം ഏറെ സഹായകമാകുമെന്നും. ഇത് നല്ലൊരു തുടക്കമാണെന്നും അദ്ദേഹം കൂട്ടിച്ചേർത്തു
അങ്ങാടി ഗ്രാമപഞ്ചായത്ത് പ്രസിഡൻ്റ് ബി സുരേഷ് വാർഡ് മെമ്പർ അനി വലിയകാലായിൽ,സ്കൂൾ പ്രിൻസിപ്പൽ അരുൺ എന്നിവർ പ്രസംഗിച്ചു.വിദ്യാർത്ഥികളിൽ സത്യസന്ധതയും സ്വയം ഉത്തരവാദിത്വം ഏറ്റെടുക്കാനുള്ള മനോഭാവവും വളർത്തുക എന്ന ലക്ഷ്യത്തോടെയാണ് ഹോണസ്റ്റി ഷോപ്പ് ആരംഭിച്ചിരിക്കുന്നത്. സാധനങ്ങൾ വാങ്ങിയ ശേഷം അവയുടെ വില സ്വയം അടയ്ക്കുകയും മറ്റുള്ളവരുടെ വിശ്വാസം കാത്തുസൂക്ഷിക്കുകയും ചെയ്യുന്ന രീതിയിലാണ് ഈ സംരംഭം പ്രവർത്തിക്കുന്നത്.

പത്തനംതിട്ട ജില്ലയിലെ പി എം ശ്രീ ജവഹർ നവോദയ വിദ്യാലയത്തിലേക്ക് ആറാം ക്ലാസിലേയ്ക്കുള്ള പ്രവേശന പരീക്ഷയ്ക്ക്  അപേക്ഷ നൽകിയവർക്ക് താഴെ പറയുന്ന സൈറ്റുകളിൽ നിന്ന് അഡ്മിറ്റ് കാർഡ് ഡൗൺലോഡ് ചെയ്യാം.

വെബ്സൈറ്റ്: http://navodaya.gov.in / http://cbseitms.rcil.gov.in
നവംബർ 28 ആണ് പരീക്ഷ തിയതി .

അഡ്മിറ്റ് കാർഡിൽ രേഖപ്പെടുത്തിയിട്ടുള്ള പരീക്ഷാ കേന്ദ്രങ്ങളിൽ കൃത്യസമയത്തിനു മുമ്പ് എത്തിച്ചേരണം.

അഡ്മിറ്റ് കാർഡ് സ്വന്തമായി ഡൗൺലോഡ് ചെയ്യാൻ സാധിക്കാത്ത പക്ഷം സ്കൂളിനെ സമീപിക്കാവുന്നതാണ്.
വിവരങ്ങൾക്ക് പ്രിൻസിപ്പൽ, ജെഎൻവി വെച്ചൂച്ചിറ

കീഴ്‌വായ്‌പ്പൂരിൽ മകളെ ഉപദ്രവിക്കുന്നത് തടയാൻ ശ്രമിക്കുന്നതിനിടെ മരുമകന്റെ ഇടിയേറ്റ് സ്ത്രീയുടെ മൂക്കിന്റെ പാലം തകർന്നു.
രക്തം വാർന്ന് അവശനിലയരായ മണിയമ്മ64 നെ ചങ്ങനാശ്ശേരി താലൂക്ക് ആശുപത്രിയിൽ പ്രവേശിപ്പിച്ചു. ആശുപത്രിയിൽ നിന്നും ലഭിച്ച വിവരമനുസരിച്ച് എത്തിയ കീഴ് വായ്പൂർ പോലീസ് , പരിക്കേറ്റ സ്ത്രീയുടെ മൊഴി രേഖപ്പെടുത്തുകയും കേസ് രജിസ്റ്റർ ചെയ്യുകയും ചെയ്തു. തുടർന്ന് നടത്തിയ അന്വേഷണത്തിൽ, പ്രതിയായ കോട്ടയം ജില്ലയിൽ തൃക്കൊടിത്താനം കാലായിൽ പാലക്കുളം ഹൗസിൽ പ്രജീഷ് പ്രസന്നൻ (32) എന്നയാളെ അറസ്റ്റ് ചെയ്തു. ഒക്ടോബർ 24ന് രാത്രി 10 മണിയോടെയാണ് ഇയാൾ ഭാര്യമാതാവിനെ ആക്രമിച്ച് പരിക്കേൽപ്പിച്ചത്. മകളെ ഉപദ്രവിക്കുന്നത് തടയാൻ ശ്രമിക്കുകയായിരുന്നു ഇവർ കീഴ് വായ്പൂർ സബ് ഇൻസ്പെക്ടർ നൗഫൽ , എ എസ് ഐ മുജീബ് , സി പി ഒ മാരായ , സന്തോഷ്‌ , വിഷ്ണുപ്രസാദ്, അൽ ബാദുഷ എന്നിവരുടെ സംഘമാണ് പ്രതിയെ അറസ്റ്റ് ചെയ്തത്. തിരുവല്ല ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു

റാന്നിയിൽ ശബരിമല തീർത്ഥാടനം സുഗമവും സുരക്ഷിതവുമാക്കാൻ വിവിധ വകുപ്പുകളും തദ്ദേശ സ്വയംഭരണ സ്ഥാപനങ്ങളും ആവശ്യമായ മുന്നൊരുക്കങ്ങൾ നടത്തണമെന്ന് റാന്നി എം.എൽ.എ അഡ്വ. പഴകുളം മധു. അയിരൂർ ഗ്രാമപഞ്ചായത്ത് തല ശബരിമല തീർത്ഥാടന മുന്നൊരുക്ക യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
അയിരൂർ പഞ്ചായത്തിൽ തിരുവാഭരണ ഘോഷയാത്ര കടന്നുപോകുന്ന വഴിയിലും മണ്ഡല-മകരവിളക്ക് തീർത്ഥാടന കാലയളവിലും തീർത്ഥാടകരെ സ്വീകരിക്കുന്നതിനും ആവശ്യമായ സൗകര്യങ്ങൾ ഒരുക്കുന്നതിനും ബന്ധപ്പെട്ടവർക്ക് എം.എൽ.എ നിർദേശങ്ങൾ നൽകി.കഴിഞ്ഞ വർഷത്തേക്കാൾ കൂടുതൽ ഫണ്ട് ഗ്രാമപഞ്ചായത്തുകൾക്ക് അനുവദിക്കണമെന്നും തീർത്ഥാടകർക്ക് മികച്ച സൗകര്യങ്ങൾ ഉറപ്പാക്കാൻ എല്ലാ വകുപ്പുകളും ഏകോപനത്തോടെ പ്രവർത്തിക്കണമെന്നും അദ്ദേഹം ആവശ്യപ്പെട്ടു
ഗ്രാമപഞ്ചായത്ത് പ്രസിഡണ്ട് സുരേഷ് കുഴിവേലിൽ അധ്യക്ഷത വഹിച്ചു.ഗ്രാമപഞ്ചായത്ത് വൈസ് പ്രസിഡണ്ട് പ്രീത ബി നായർ സ്റ്റാൻഡിങ് കമ്മിറ്റി ചെയർമാൻമാരായ സന്തോഷ് ജോസഫ് കൊച്ചുപറമ്പിൽ ,ശ്രീകല ഹരികുമാർ, സാംകുട്ടി അയ്യക്കാവിൽ, ഗ്രാമപഞ്ചായത്ത് അംഗങ്ങളായ മഞ്ജുഷ ടി സി, സുജാത സന്തോഷ്, അഭിനു മത്തായി, ബോബൻ താഴമൺ, സുലേഖ ചന്ദ്രശേഖരൻ, അജയ് ഗോപിനാഥ്, സ്മിത സോമശേഖരൻ ,രേണുക സജികുമാർ, ലിസി ശാമുവേൽ, അമ്പിളി പ്രഭാകരൻ നായർ, അനിതാകുറിപ്പ്, പഞ്ചായത്ത് സെക്രട്ടറി സജീഷ് ടി എസ് റവന്യൂ ഉദ്യോഗസ്ഥർ ,വാട്ടർ അതോറിറ്റി, വൈദ്യുതി ,ഇറിഗേഷൻ ,പോലീസ്, എക്സൈസ്, ഫോറസ്റ്റ് ,ഫയർ ആൻഡ് റെസ്ക്യൂ ആരോഗ്യം ഹോമിയോ ഉദ്യോഗസ്ഥർ ,പുതിയകാവ്, പുത്തൻ ശബരിമല, ഇടപ്പാവൂർ, മൂക്കന്നൂർ, ക്ഷേത്ര ഉപദേശ സമിതി ഭാരവാഹികൾ, ദേവസ്വം സബ്ബ്ഗ്രൂപ്പ് ഓഫീസർമാർ തുടങ്ങിയവർ പങ്കെടുത്തു മണ്ഡലമര മകരവിളക്ക് തിരുവാഭരണ ഘോഷയാത്ര പ്രവർത്തനങ്ങൾ ഏകോപിപ്പിക്കുന്നതിനായി എല്ലാ വകുപ്പുകളുടെയും ഓരോ ഉദ്യോഗസ്ഥരെ നോഡൽ ഓഫീസർമാരായും പ്രവർത്തനങ്ങൾ ഏകോപിപ്പിക്കുവാൻ അയിരൂർ വില്ലേജ് ഓഫീസറെ കോഡിനേറ്ററായും തീരുമാനിച്ചു

കൂടലിൽ മുൻവിരോധം കാരണം യുവാവിനെ മർദ്ദിച്ച് മൂക്കിന്റെ അസ്ഥി പൊട്ടിച്ച കേസിൽ മൂന്നുപേരെ കൂടൽ പോലീസ് അറസ്റ്റ് ചെയ്തു. പത്തനാപുരം മാങ്കോട് മുള്ളൂർനിരപ്പ് സുജിത്ത് ഭവൻ വീട്ടിൽ സാമ്പൻ എന്നുവിളിക്കുന്ന അജിത്ത് (27), മാങ്കോട് വാഴപ്പാറ ബിനോയ് വിലാസത്തിൽ നിന്നും, മാങ്കോട് വാഴത്തോട്ടം ബാബുവിന്റെ വീട്ടിൽ വാടകയ്ക്ക് താമസിക്കുന്ന കിണ്ടി എന്ന സുധീഷ് (20), വാഴപ്പാറ രത്നഗിരി പുത്തൻ വീട്ടിൽ ആഷിക് (18) എന്നിവരാണ് പിടിയിലായത്.അജിത്ത് ഒന്നാം പ്രതിയും, സുധീഷ് രണ്ടാം പ്രതിയും, ആഷിക് നാലാം പ്രതിയുമാണ്. കേസിൽ ആകെ 5 പ്രതികളാണ് ഉള്ളത്. മറ്റ് പ്രതികൾക്കായുള്ള അന്വേഷണം പോലീസ് ഊർജ്ജിതമാക്കി. വ്യാപകമായി നടത്തിയ തെരച്ചിലിനൊടുവിൽ വീടുകളുടെ സമീപത്തുനിന്നും ഇന്ന് രാവിലെ പ്രതികളെ സാഹസികമായി പോലീസ് കസ്റ്റഡിയിലെടുക്കുകയായിരുന്നു.മുള്ളൂർനിരപ്പ് താഴെ വാഴത്തോട്ടം ലക്ഷ്മി സദനത്തിൽ സജികുമാറിനാണ് പ്രതികളുടെ മർദ്ദനമേറ്റത്. മകളെ വീടിനുമുന്നിൽ വച്ച് മദ്യപിച്ചെത്തിയ അജിത്ത് അസഭ്യം വിളിച്ചതു ചോദ്യം ചെയ്തതിലുള്ള വിരോധം കാരണം ഈമാസം 19 ന് പുലർച്ചെ സ്വകാര്യ വ്യക്തിയുടെ റബ്ബർ തോട്ടത്തിൽ ടാപ്പിംഗിന് എത്തിയ സജികുമാറിനെ പ്രതികൾ സംഘം ചേർന്ന് മർദ്ദിക്കുകയായിരുന്നു.ആക്രമണത്തിൽ സജിയുടെ മൂക്കിന്റെ അസ്ഥിക്ക് പൊട്ടൽ സംഭവിക്കുകയും ശരീരം മുഴുവൻ മർദ്ദനം ഏൽക്കുകയും ചെയ്തു. പത്തനാപുരം ഗവണ്മെന്റ് ആശുപത്രിയിൽ ചികിത്സ തേടിയ സജിയെ, പരിക്ക് ഗുരുതരമായതിനാൽ പുനലൂർ താലൂക്ക് ആശുപത്രിയിലേക്കും , തുടർന്ന് തിരുവനന്തപുരം മെഡിക്കൽ കോളേജ് ആശുപത്രിയിലേക്കും മാറ്റിയിരുന്നു.
എ എസ് ഐ അജി കർമ സജികുമാറിന്റെ മൊഴി വാങ്ങി, എസ് എച്ച് ഓ ആർ രാജിവ് പ്രതികൾക്കെതിരെ കേസ് രജിസ്റ്റർ ചെയ്തു അന്വേഷണം ആരംഭിച്ചു. തുടർന്ന് നടത്തിയ ഊർജ്ജിതമായ തെരച്ചിലിനൊടുവി ൽ പോലീസ് സംഘം സാഹസികമായി പ്രതികളെ കുടുക്കുകയായിരുന്നു പത്തനാപുരം പോലീസ് സ്റ്റേഷനിലെ മൂന്നു കേസുകളിൽ പ്രതിയാണ് അജിത്ത്. ആക്രമിച്ച് പരിക്കേൽപ്പിക്കൽ, സ്ത്രീകൾക്ക് നേരെയുള്ള അതിക്രമം, പോക്സോ എന്നീ വകുപ്പുകൾ പ്രകാരമെടുത്ത കേസുകളാണിവ.
ഗുണ്ടാ നിയമപ്രകാരമുള്ള മുൻകരുതൽ നടപടികളും ഇയാൾക്കെതിരെ പത്തനാപുരം പോലീസ് സ്വീകരിച്ചിരുന്നു. പോലീസ് അന്വേഷിച്ച് എത്തിയ സമയം വീടിന് സമീപം പ്രശ്നമുണ്ടാക്കി കൊണ്ടിരുന്ന അജിത്തിനെ ബലപ്രയോഗത്തിലൂടെയാണ് പോലീസ് കീഴ്പ്പെടുത്തിയത്. ഇയാളിൽ നിന്നുള്ള വിവരത്തിന്റെ അടിസ്ഥാനത്തിൽ മറ്റുരണ്ട് പ്രതികളെയും പിടികൂടി. പ്രതികളെ പത്തനംതിട്ട ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതിയിൽ ഹാജരാക്കി.

മലയാലപ്പുഴയിൽ പ്രായപൂർത്തിയാകാത്ത പെൺകുട്ടിയെ പ്രണയം നടിച്ച് വശീകരിച്ച് കടത്തിക്കൊണ്ടു പോവുകയും , എറണാകുളത്ത് ലോഡ്ജിൽ എത്തിച്ച് താമസിപ്പിക്കുകയും ലൈംഗികമായി പീഡിപ്പിക്കുകയും ചെയ്ത കേസിൽ യുവാവിനെ മലയാലപ്പുഴ പോലീസ് അറസ്റ്റ് ചെയ്തു മലയാലപ്പുഴ പോലീസ് സ്റ്റേഷൻ പരിധിയിൽ വടശ്ശേരിക്കര മനോരമ ജംഗ്ഷൻ എന്ന സ്ഥലത്ത് കയ്യും കല്ലിൽ വീട്ടിൽ വിനീഷ് രാജീവ് (20 ആണ് എറണാകുളത്തുനിന്ന് പിടിയിലായത് ഒക്ടോബർ 23 വെള്ളിയാഴ്ചയാണ് ഇയാൾ പ്രായപൂർത്തിയാകാത്ത പെൺകുട്ടിയെ വീട്ടിൽ നിന്നും കടത്തിക്കൊണ്ടുപോയത്. കേസ് രജിസ്റ്റർ ചെയ്ത മലയാലപ്പുഴ പോലീസ് വിശദമായ അന്വേഷണത്തിനൊടുവിൽ പ്രതിയെ എറണാകുളത്തു നിന്ന് പിടികൂടി. പത്തനംതിട്ട സർക്കിൾ ഇൻസ്പെക്ടർ ജി അരുണിന്റെ നേതൃത്വത്തിലുള്ള അന്വേഷണ സംഘത്തിൽ
സബ് ഇൻസ്പെക്ടർമാരായ ജെ. ജോഷി, ഷെമിമോൾ , എ എസ് ഐ മാത്യുഎബ്രഹാം , എസ് സി പി ഒ ഡിക്രൂസ് ഗബ്രിയൽ, ഇർഷാദ് സി പി ഒ മാരായ അനൂപ് , വൈശാഖ് ജി എസ്, ഗോപകുമാർ ,ദർശന എന്നിവരാണ് ഉണ്ടായിരുന്നത്. പത്തനംതിട്ട അഡീഷണൽ ജില്ലാ & സെഷൻസ് പോക്സോ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മല്ലപ്പള്ളി ഉപജില്ലാ സ്കൂൾ കലോത്സവം നവംബർ 7മുതൽ 11 വരെ നടക്കും
മല്ലപ്പള്ളി ഉപജില്ലയിലെ പ്രൈമറി തലം മുതൽ ഹയർ സെക്കൻഡറി വരെയുള്ള കുട്ടികൾ പങ്കെടുക്കുന്ന ഉപജില്ലാ സ്കൂൾ കലോത്സവം ചെങ്ങരൂർ സെൻറ് തെരേസാസ് ഹയർ സെക്കണ്ടറി സ്കൂൾ , എം.ജി. ഡി. ഹൈസ്കൂൾ പുതുശ്ശേരി എന്നീ സ്കൂളുകളിൽ വെച്ച് നടത്തുവാൻ തീരുമാനിച്ചു.
കലോത്സവവുമായി ബന്ധപ്പെട്ടുള്ള സ്വാഗതസംഘ രൂപീകരണം. ചെങ്ങരൂർ സെന്റ് തെരേസാസ് ഹയർ സെക്കൻഡറി സ്കൂളിൽ നടന്നു. പ്രിൻസിപ്പാൾ സിസ്റ്റർ മെർലിറ്റ് അധ്യക്ഷത വഹിച്ചു.കല്ലൂപ്പാറ ഗ്രാമപഞ്ചായത്ത് പ്രസിഡന്റ് ജ്ഞാനമണി മോഹൻ യോഗം ഉദ്ഘാടനം ചെയ്തു. യോഗത്തിൽ മല്ലപ്പള്ളി എ ഇ ഒ ജയചന്ദ്രൻ കെ സ്വാഗതം ആശംസിച്ചു. മല്ലപ്പള്ളി ഗ്രാമപഞ്ചായത്ത് പ്രസിഡന്റ് കെ ജി സാബു, കവിയൂർ ഗ്രാമപഞ്ചായത്ത് പ്രസിഡന്റ് ഗീത അപ്പുക്കുട്ടൻ, മല്ലപ്പള്ളി ഗ്രാമപഞ്ചായത്ത് വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ അനു എബി വർഗീസ്, കവിയൂർ ഗ്രാമപഞ്ചായത്ത് വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ബീന സി ജോൺ, കുന്നന്താനം ഗ്രാമപഞ്ചായത്ത് വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ഗീതകുമാരി, പിടിഎ പ്രസിഡണ്ട് അഡ്വക്കേറ്റ് സാം പട്ടേരി,സ്കൂൾ എച്ച്. എം.സിസ്റ്റർ ലീമാ റോസ്, മല്ലപ്പള്ളി ബിപിസി ആശ പി എസ് , ജി ജി വർഗീസ്,ടി. എച്ച്. ഹാഷിം,രാജൻ.കെ.കെ,കുര്യൻ ഉമ്മൻ എന്നിവർ പ്രസംഗിച്ചു. കലോത്സവത്തിന്റെ നടത്തിപ്പിനായി കല്ലൂപ്പാറ ഗ്രാമപഞ്ചായത്ത് പ്രസിഡന്റ് ചെയർപേഴ്സണായും സ്കൂൾ പ്രിൻസിപ്പൽ ജനറൽ കൺവീനറായും വിവിധ സബ് കമ്മിറ്റികളുടെ ചെയർമാൻമാരായി ഗ്രാമ പഞ്ചായത്ത് മെമ്പർമാരും അധ്യാപക സംഘടന പ്രതിനിധികൾ കൺവീനർമാരായും സ്വാഗതസംഘം രൂപീകരിച്ചു. നവംബർ 7ന് രചന മത്സരങ്ങൾ എം ജി ഡി ഹൈസ്കൂൾ പുതുശ്ശേരിയിലും 9,10,11 തീയതികളിൽ കലാ മത്സരങ്ങൾ ചെങ്ങരൂർ സെൻറ് തെരേസാസ് ഹയർ സെക്കണ്ടറി സ്കൂളിലും നടക്കും.

ഭരണഭാഷാ വാരാഘോഷം : ജില്ലാ ഇന്‍ഫര്‍മേഷന്‍ ഓഫീസ് സര്‍ക്കാര്‍ ജീവനക്കാര്‍ക്കായി സാഹിത്യരചന മല്‍സരം സംഘടിപ്പിക്കുന്നു

മലയാള ദിനാചരണത്തിന്റെയും ഭരണഭാഷ വാരാഘോഷത്തിന്റെയും ഭാഗമായി ജില്ലാ ഇന്‍ഫര്‍മേഷന്‍ ഓഫീസ് ജില്ലാ ഭരണകൂടവുമായി ചേര്‍ന്ന് സര്‍ക്കാര്‍ ജീവനക്കാര്‍ക്കായി കഥ, കവിത രചന മല്‍സരങ്ങള്‍ സംഘടിപ്പിക്കുന്നു. നവംബര്‍ രണ്ടിന് കളക്ടറേറ്റിലാണ് മല്‍സരം. പങ്കെടുക്കാന്‍ ആഗ്രഹിക്കുന്നവര്‍ പേര്, പെന്‍ നമ്പര്‍, ഫോണ്‍ നമ്പര്‍, ഓഫീസ് വിലാസം എന്നിവ 9447667716 എന്നതിലേക്ക് വാട്സാപ് ചെയ്തോ pathanamthittadio37@gmail.com ലേക്ക് ഇമെയില്‍ ചെയ്തോ നവംബര്‍ ഒന്നിനു മുമ്പായി രജിസ്റ്റര്‍ ചെയ്യണം.

വര്‍ണ്ണോല്‍സവം ഒക്ടോബര്‍ 31ന്

ജില്ല ശിശുക്ഷേമ സമിതിയുടെ നേതൃത്വത്തില്‍ ശിശുദിനത്തിന് മുന്നോടിയായി നടക്കുന്ന ‘ വര്‍ണ്ണോല്‍സവം 2026 ‘ ഒക്ടോബര്‍ 31 രാവിലെ ഒമ്പതിന് പത്തനംതിട്ട മാര്‍ത്തോമ ഹയര്‍ സെക്കന്‍ഡറി സ്‌കൂളില്‍ നഗരസഭ ചെയര്‍പേഴ്‌സണ്‍ സിന്ധു അനില്‍ ഉദ്ഘാടനം ചെയ്യും. രാവിലെ 9.30 ന് പ്രസംഗം (മലയാളം ആന്റ് ഇംഗ്ലീഷ്), പദ്യപാരായണം (മലയാളം ആന്റ് ഇംഗ്ലീഷ്), ദേശഭക്തിഗാനം മല്‍സരങ്ങളും ഉച്ചയ്ക്ക് 1.30 ന് കഥാരചന (മലയാളം ആന്റ് ഇംഗ്ലീഷ്), കവിതാ രചന (മലയാളം ആന്റ് ഇംഗ്ലീഷ്) മല്‍സരങ്ങളും നടക്കും.

പത്രപ്രവര്‍ത്തക- പത്രപ്രവര്‍ത്തകേതര ക്ഷേമ പെന്‍ഷന്‍: ലൈഫ് സര്‍ട്ടിഫിക്കറ്റ് നവംബര്‍ 30നകം നല്‍കണം

ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പിന്റെ കോട്ടയം മേഖലയില്‍ (കോട്ടയം, ഇടുക്കി, പത്തനംതിട്ട ജില്ലകള്‍) വിവിധ പത്രപ്രവര്‍ത്തക- പത്രപ്രവര്‍ത്തകേതര ക്ഷേമ പെന്‍ഷന്‍ കൈപ്പറ്റി വരുന്ന എല്ലാ ഗുണഭോക്താക്കളും നവംബര്‍ 30നകം ലൈഫ് സര്‍ട്ടിഫിക്കറ്റ് നിശ്ചിത മാതൃകയില്‍ നല്‍കണം. ഗസറ്റഡ് ഓഫീസര്‍ നവംബറിലെ തീയതിയില്‍ സാക്ഷ്യപ്പെടുത്തിയ ലൈഫ് സര്‍ട്ടിഫിക്കറ്റ് അല്ലെങ്കില്‍ നവംബര്‍ തീയതിയിലുള്ള ജീവന്‍ പ്രമാണിന്റെ സ്വയം സാക്ഷ്യപ്പെടുത്തിയ പകര്‍പ്പാണ് വകുപ്പില്‍ നല്‍കേണ്ടത്. നേരിട്ടോ ദൂതന്‍ മുഖേനയോ സര്‍ട്ടിഫിക്കറ്റ് നല്‍കാം. ദൂതന്‍ മുഖേന നല്‍കുന്നവര്‍ പെന്‍ഷണറുടെ ഫോട്ടോ പതിച്ച സര്‍ക്കാര്‍ അംഗീകൃത തിരിച്ചറിയല്‍ രേഖയുടെ സ്വയം സാക്ഷ്യപ്പെടുത്തിയ (ഒപ്പ്, പേര്, തീയതി എന്നിവ രേഖപ്പെടുത്തിയത്) പകര്‍പ്പ് കൂടി നല്‍കണം. കോട്ടയം ജില്ലയിലുള്ളവര്‍ കലക്ടറേറ്റ് സമുച്ചയത്തിലെ (സിവില്‍ സ്റ്റേഷന്‍) ഒന്നാം നിലയിലുള്ള ഐ.പി.ആര്‍.ഡി. റീജണല്‍ ഡെപ്യൂട്ടി ഡയറക്ടറുടെ ഓഫീസിലും പത്തനംതിട്ട ജില്ലയില്‍ ഉള്ളവര്‍ കലക്ടറേറ്റിലെ ജില്ലാ ഇന്‍ഫര്‍മേഷന്‍ ഓഫീസിലുമാണ് സര്‍ട്ടിഫിക്കറ്റ് നല്‍കേണ്ടത്. സര്‍ട്ടിഫിക്കറ്റിന്റെ മാതൃക www.prd.kerala.gov.in  ല്‍ ലഭിക്കും. വിവരങ്ങള്‍ക്ക് റീജണല്‍ ഓഫീസിലെ 0481 2561030 എന്ന നമ്പരിലോ പത്തനംതിട്ട ജില്ലാ ഇന്‍ഫര്‍മേഷന്‍ ഓഫീസിലെ 0468 2222657 നമ്പരിലോ ബന്ധപ്പെടണം. ജീവന്‍ പ്രമാണ്‍ പോര്‍ട്ടല്‍: jeevanpramaan.gov.in   .

താല്‍ക്കാലിക നിയമനം

മിഷന്‍ വാത്സല്യ പദ്ധതിയുടെ ഭാഗമായി പത്തനംതിട്ട ജില്ലാ ശിശുസംരക്ഷണ യൂണിറ്റിന് കീഴിലെ ജില്ലാ ചൈല്‍ഡ് ഹെല്‍പ്പ് ലൈന്‍ യൂണിറ്റില്‍ ഒഴിവുള്ള ചൈല്‍ഡ് ഹെല്‍പ് ലൈന്‍ സൂപ്പര്‍വൈസര്‍ (യോഗ്യത: ഹെല്‍പ് ലൈന്‍ സൂപ്പര്‍വൈസര്‍: അംഗീകൃത സര്‍വകലാശാലയില്‍ നിന്നുള്ള സോഷ്യല്‍ വര്‍ക്ക്, കമ്പ്യൂട്ടര്‍ സയന്‍സ്, ഇന്‍ഫര്‍മേഷന്‍ ടെക്‌നോളജി, കമ്മ്യൂണിറ്റി സോഷ്യോളജി, സോഷ്യല്‍ സയന്‍സ് എന്നീ വിഷയങ്ങളിലുള്ള ബിരുദം, കമ്പ്യൂട്ടര്‍ പരിജ്ഞാനം അഭികാമ്യം, എമര്‍ജന്‍സി ഹെല്‍പ്പ് ലൈനുകളില്‍ പ്രവൃത്തി പരിചയമുള്ളവര്‍ക്ക് മുന്‍ഗണന), കേസ് വര്‍ക്കര്‍ (യോഗ്യത: പ്ലസ് ടു വിജയം, മികച്ച ആശയവിനിമയ ശേഷി, എമര്‍ജന്‍സി ഹെല്‍പ്പ് ലൈനുകളില്‍ പ്രവൃത്തി പരിചയമുള്ളവര്‍ക്ക് മുന്‍ഗണന.) തസ്തികകളിലെ ഓരോ ഒഴിവിലേക്ക് ദിവസവേതന അടിസ്ഥാനത്തില്‍ നിയമനം നടത്തുന്നു. ഉദ്യോഗാര്‍ത്ഥികള്‍ വയസ്, യോഗ്യത, പ്രവൃത്തി പരിചയം എന്നിവ തെളിയിക്കുന്ന രേഖകളുടെ സ്വയം സാക്ഷ്യപ്പെടുത്തിയ പകര്‍പ്പ് സഹിതം നവംബര്‍ ഏഴ് രാവിലെ 10 ന് പത്തനംതിട്ട ജില്ലാ ചൈല്‍ഡ് പ്രൊട്ടക്ഷന്‍ ഓഫീസില്‍ (ചൈല്‍ഡ് പ്രൊട്ടക്ഷന്‍ യൂണിറ്റ്, മിനി സിവില്‍ സ്റ്റേഷന്‍ മൂന്നാം നില, ആറന്മുള, പത്തനംതിട്ട) അഭിമുഖത്തിന് ഹാജരാകണം. ഫോണ്‍: 0468 2319998, 9544249449.

ഗതാഗത നിരോധനം

തിരുവല്ല – കുമ്പഴ റോഡില്‍ പത്തനംതിട്ട സെന്‍ട്രല്‍ ജംഗ്ഷന്‍ മുതല്‍ കുമ്പഴ മാര്‍ക്കറ്റ് ജംഗ്ഷന്‍ വരെ അറ്റകുറ്റപ്പണി  നടക്കുന്നതിനാല്‍ ഇന്നും നാളെയും (ഒക്ടോബര്‍ 28, 29) ഇതുവഴിയുള്ള വാഹനഗതാഗതം പൂര്‍ണമായും നിരോധിച്ചതായി പത്തനംതിട്ട പൊതുമരാമത്ത് നിരത്ത് സെക്ഷന്‍ അസിസ്റ്റന്റ് എഞ്ചിനീയര്‍ അറിയിച്ചു. ഫോണ്‍: 7594972121.

വാഹനം ആവശ്യമുണ്ട്

പറക്കോട് അഡീഷണല്‍ ശിശു വികസന പദ്ധതി ഓഫീസ് ഉപയോഗത്തിന് ടാക്‌സി പെര്‍മിറ്റുളള ഏഴ് വര്‍ഷത്തിലധികം പഴക്കമില്ലാത്ത വാഹനം കരാര്‍ വ്യവസ്ഥയില്‍ വാടകയ്ക്ക് നല്‍കുന്നതിന് ടെന്‍ഡര്‍ ക്ഷണിച്ചു. ടെന്‍ഡര്‍ സ്വീകരിക്കുന്ന അവസാന തീയതി നവംബര്‍ 11 ഉച്ചയ്ക്ക് ഒന്ന്. ഫോണ്‍: 04734 216444, 9188959677.

എംപ്ലോയ്‌മെന്റ് എക്‌സ്‌ചേഞ്ചില്‍ സെലക്ട് ലിസ്റ്റുകള്‍ പ്രസിദ്ധീകരിച്ചു

പത്തനംതിട്ട ജില്ലയിലെ എല്ലാ എംപ്ലോയ്‌മെന്റ് എക്‌സ്‌ചേയ്ഞ്ചുകളിലും 2027-29 വര്‍ഷം അറിയിക്കാന്‍ സാധ്യതയുള്ള വിവിധ ഒഴിവുകളിലേക്ക് പരിഗണിക്കുന്നതിന് താല്‍ക്കാലിക സെലക്ട് ലിസ്റ്റ് തയ്യാറാക്കി. ഉദ്യോഗാര്‍ത്ഥികള്‍ക്ക് എംപ്ലോയ്‌മെന്റ് രജിസ്‌ട്രേഷന്‍ കാര്‍ഡുമായി ബന്ധപ്പെട്ട എംപ്ലോയ്‌മെന്റ് എക്‌സ്‌ചേഞ്ചുകളില്‍ നേരിട്ട് ഹാജരായോ www.eemployment.kerala.gov.in  ലൂടെയോ ലിസ്റ്റ് പരിശോധിക്കാം. സെലക്ട് ലിസ്റ്റുകള്‍ സംബന്ധിച്ച പരാതികള്‍ ഉള്ള പക്ഷം നവംബര്‍ 18 ന് മുമ്പ് രജിസ്റ്റര്‍ ചെയ്ത എംപ്ലോയ്‌മെന്റ് എക്‌സ്‌ചേഞ്ചില്‍ നേരിട്ട് ഹാജരായി രേഖാമൂലം അപേക്ഷ സമര്‍പ്പിക്കണം. ഫോണ്‍: 0468 2222745.

ടെന്‍ഡര്‍

സംസ്ഥാന ടൂറിസം വകുപ്പ് നിര്‍മിച്ച ഡിറ്റിപിസിയുടെ നിയന്ത്രണത്തിലുള്ള അരുവിക്കുഴി ടൂറിസം പദ്ധതി അഞ്ച് വര്‍ഷത്തേക്ക് നിലവിലെ അവസ്ഥയില്‍ വ്യവസ്ഥകള്‍ക്ക് വിധേയമായി ഏറ്റെടുത്ത് നടത്തുന്നതിന് സ്ഥാപനങ്ങള്‍, വ്യക്തികളില്‍ നിന്ന് ടെന്‍ഡര്‍ ക്ഷണിച്ചു. അവസാന തീയതി നവംബര്‍ 13 രാവിലെ 11. വിവരങ്ങള്‍ക്ക് കോഴഞ്ചേരി ഡിറ്റിപിസി കാര്യാലയവുമായി ബന്ധപ്പെടണം. ഫോണ്‍ 0468 2311343, 9447709944

റാന്നി വിദ്യാഭ്യാസ ഉപജില്ലാ സ്കൂൾ കലോത്സവം നവംബർ 7,9,10,11 തീയതികളിൽ വെച്ചൂച്ചിറ എണ്ണൂറാം വയൽ സി എം എസ് എൽ പി സ്കൂളിൽ നടക്കും. റാന്നി വിദ്യാഭ്യാസ ഉപജില്ലയിലെ 72 വിദ്യാലയങ്ങളിൽ നിന്നായി 2500 ൽ അധികം കലാപ്രതിഭകൾ നാല് ദിവസങ്ങളിലായി നടക്കുന്ന കലോത്സവത്തിൽ പങ്കെടുക്കും. കലോത്സവത്തിന്റെ സ്വാഗത സംഘം രൂപീകരണ യോഗം പഞ്ചായത്ത്‌ പ്രസിഡന്റ്‌ എസ് രമാദേവി ഉദ്ഘാടനം ചെയ്തു.ടി കെ ജെയിംസ് അധ്യക്ഷത വഹിച്ചു.ബ്ലോക്ക് പഞ്ചായത്ത്‌ സ്ഥിരം സമിതി അധ്യക്ഷ മേഴ്സി ഫിലിപ്പ്, നിഷ അലക്സ് ഗ്രാമ പഞ്ചായത്ത് വൈസ് പ്രസിഡന്റ്‌ ഇ വി വർക്കി, അംഗങ്ങളായ രാജി വിജയകുമാർ, ബിന്ദു തോമസ്,അനീഷ് കുന്നപ്പുഴ, ഷാജി കൈപ്പുഴ,ലിനോജ്‌ കണയങ്കൽ,പ്രിയ സുരേന്ദ്രൻ,, ലിനി ജയൻ,മഞ്ജു മോളിക്കൽ,ഷിജി, അനു,റെസി ജോഷി,സതീഷ് കെ പണിക്കർ ഉപ ജില്ലാ വിദ്യാഭ്യാസ ഓഫീസർ രജിത ആർ നായർ, സാബു പുല്ലാട്ട്, വി ജി കിഷോർ, സന്തോഷ്‌ ബാബു, ടി കെ സാജു, , ആർ വരദരാജൻ, ഷൈനു ചാക്കോ, ഫെമി ഹേമന്ത്,എന്നിവർ പ്രസംഗിച്ചു. സ്വാഗത സംഘം ഭാരവാഹികളായി ആന്റോ ആന്റണി എം പി, പഴകുളം മധു എം എൽ എ, ദീനാമ്മ റോയ്, സോണിയ മനോജ്‌, ടി കെ സാജു എന്നിവർ രക്ഷാധികാരികളും എസ് രമാദേവി (ചെയർമാൻ ) സതീഷ് കെ പണിക്കർ (വർക്കിംഗ്‌ ചെയർമാൻ )സാബു പുല്ലാട്ട് (ജനറൽ കൺവീനർ ) രജിത ആർ നായർ (ട്രഷറര്‍ )എന്നിവരടങ്ങുന്ന 501 അംഗ സ്വാഗത സംഘം രൂപീകരിച്ചു

1. കോന്നിയിൽ പ്രായപൂർത്തിയാകാത്ത പെൺകുട്ടി മാത്രമുള്ള വീട്ടിൽ കടന്നു കയറി കുട്ടിയെ കടന്നു പിടിക്കുകയും ലൈംഗികമായി ഉപദ്രവിക്കാൻ ശ്രമിക്കുകയും ചെയ്ത കേസിൽ ഒരാളെ കോന്നി പോലീസ് അറസ്റ്റ് ചെയ്തു. കോന്നി വകയാർ സ്വദേശി വൈറ്റ് ഹൗസിൽ ലൗജൻ ഹസൻകുട്ടി (53) എന്നയാളാണ് കോന്നി പോലീസിന്റെ പിടിയിലായത്. വ്യാഴാഴ്ച വൈകിട്ട് അഞ്ചുമണിയോടെയാണ് കേസിന് ആസ്പദമായ സംഭവം ഉണ്ടായത്. പ്രായപൂർത്തിയാകാത്ത പെൺകുട്ടി മാത്രമുള്ള വീട്ടിൽ കടന്നു കയറിയ ഇയാൾ കുട്ടിയെ ഉപദ്രവിക്കാൻ ശ്രമിക്കുകയായിരുന്നു. പെൺകുട്ടിയുടെ മൊഴി രേഖപ്പെടുത്തി കേസ് രജിസ്റ്റർ ചെയ്ത കോന്നി പോലീസ് അന്വേഷണം നടത്തുകയും വളരെ വേഗത്തിൽ പ്രതിയെ അറസ്റ്റ് ചെയ്യുകയും ചെയ്തു.
   കോന്നി പോലീസ് സർക്കിൾ ഇൻസ്പെക്ടർ കിരൺ വി എസ് , സബ് ഇൻസ്പെക്ടർ ഷൈജു എസ് , എസ് സി പി ഒ അനീഷ്, സി പി ഒ മാരായ ശരത്ത്.എസ്, ഗോകുൽ എന്നിവ അടങ്ങിയ സംഘമാണ് പ്രതിയെ പിടികൂടിയത് പ്രതിയെ കോടതിയിൽ ഹാജരാക്കി