വടശ്ശേരിക്കര വോളിബോൾ സംസ്ഥാന ടീമിലേക്ക് സെലക്ഷൻ ലഭിച്ച പേഴുംപാറ മുള്ളുവേങ്ങ പുറത്ത് ജയന്റെയും അശ്വതിയുടെയും മകൻ അശ്വിൻ ജയ്നെ ഇ കെ. ചെല്ലപ്പൻ ഫൗണ്ടേഷന്റെ ആഭിമുഖ്യത്തിൽ അഭിനന്ദനങ്ങളും,ആദരവും, അർപ്പിച്ചു.
ഇ കെ ചെല്ലപ്പൻ ഫൗണ്ടേഷൻ ജനറൽ കൺവീനർ എം സി ജയകുമാർ, മുൻ പഞ്ചായത്ത് മെമ്പർ ജോയി
പഴൂർ,ഡയറക്ടർ ബോർഡ് അംഗങ്ങളായ എബ്രഹാം ഫിലിപ്പ്,ബിനീഷ് മണിയാർ, കുടുംബ അംഗങ്ങൾ,എന്നിവർ സന്നിഹിതരായി
ഇ കെ ചെല്ലപ്പൻ ഫൗണ്ടേഷന്റെ ആഭിമുഖ്യത്തിൽ ആദരവ് നൽകി
മലയാലപ്പുഴയിൽ വാഹന പരിശോധനയ്ക്കിടെ യുവാവിൽ നിന്നും എംഡി എം എ പിടികൂടി, രണ്ടുപേർ അറസ്റ്റിലായി
മലയാലപ്പുഴയിൽഓപ്പറേഷൻ തൂഫാൻ 2.0 ന്റെ ഭാഗമായുള്ള പരിശോധനകൾ ജില്ലയിൽ തുടരുന്നതിനിടെ മലയാലപ്പുഴ പോലീസ് നടത്തിയ വാഹന പരിശോധനയിൽ മദ്യപിച്ച് വാഹനമോടിച്ചെത്തിയ യുവാവിന്റെ പക്കൽ നിന്നും 1.46 ഗ്രാം എം ഡി എം എ പിടികൂടി.
മലയാലപ്പുഴ താഴം എന്ന സ്ഥലത്ത് ദേവീ സദനം വീട്ടിൽ കാർത്തിക് ഹരി (28) ആണ് എംഡി എം എയുമായി മലയാലപ്പുഴ പോലീസിന്റെ പിടിയിലായത്. തുടർന്ന് നടത്തിയ അന്വേഷണത്തിൽ ഇയാൾക്ക് രാസ ലഹരി വിൽപ്പന നടത്തിയ അടൂർ പെരിങ്ങനാട് എന്ന സ്ഥലത്ത് സ്വരലയ വീട്ടിൽ ഷൈൻ കെ പ്രസന്നൻ (30) എന്ന ആളെയും പിടികൂടിയിട്ടുണ്ട്. മലയാലപ്പുഴ സ്വദേശിക്ക് എംഡി എം എ വിൽപ്പന നടത്തിയ രണ്ടാം പ്രതിയായ ഷൈൻ അടൂർ പോലീസ് സ്റ്റേഷനിലെയും അടൂർ എക്സൈസ് സ്റ്റേഷനിലെയും മയക്കുമരുന്ന് കേസുകളിൽ പ്രതിയാണ്. കൂടാതെ ഇയാൾ എറണാകുളം പാലാരിവട്ടം സ്റ്റേഷനിലെ റേപ്പ് കേസിലും പ്രതിയാണ്.
എസ് ഐ ഷാൻ എൻഎസ്, എ എസ് ഐമാത്യു എബ്രഹാം ,എസ് സി പി ഒ മാരായ ടെന്നിസൺ , ബിജു ,സി പി ഒ മാരായ സജിത്ത് , അരുൺകുമാർ, പ്രതീപ് , ഗോപൻ ,ഹിതീഷ് എന്നിവർ അടങ്ങിയ പോലീസ് സംഘമാണ് രണ്ട് പ്രതികളെയും പിടികൂടിയത്. പത്തനംതിട്ട ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതിയിൽ ഹാജരാക്കിയ രണ്ട് പ്രതികളെയുംറിമാൻഡ് ചെയ്തു
യു കെ വിസ തട്ടിപ്പ്: ഹർജിക്കാരന് 19.49 ലക്ഷം രൂപ നഷ്ടപരിഹാരം നൽകാൻ ഉപഭോക്തൃ കമ്മീഷൻ വിധി
- പത്തനംതിട്ടയിൽ വിദേശത്ത് ജോലി വാഗ്ദാനം ചെയ്ത് വസ്തു ഈടുവെച്ച് ലോണെടുത്ത് തട്ടിപ്പ് നടത്തിയ സംഭവത്തിൽ പരാതിക്കാരന് 19.49 ലക്ഷം രൂപ തിരികെ നൽകാൻ പത്തനംതിട്ട ജില്ല ഉപഭോക്തൃ തർക്കപരിഹാര കമ്മീഷൻ ഉത്തരവിട്ടു.ഇലന്തൂര്‍ ചുരുളിക്കോട് നിരവേൽ വീട്ടിൽ ജിജി മാത്യുവാണ് കോട്ടയം ആസ്ഥാനമായി പ്രവർത്തിക്കുന്ന ‘കാൻ അഷ്വർ കൺസൾട്ടൻസി സർവീസസ് ആൻഡ് സെന്റർ ഫോർ കമ്പ്യൂട്ടർ എഡ്യൂക്കേഷൻ’ സ്ഥാപനത്തിനും ഉടമകൾക്കുമെതിരെ കമ്മീഷനെ സമീപിച്ചത്. യു.കെയിൽ യുകെയിൽ ഹെൽത്ത് കെയർ അസിസ്റ്റന്റ്, ഐ.ഇ.എൽ.ടി.എസ് പരിശീലനം വഴി ജോലി വാഗ്ദാനം ചെയ്യുന്ന പരസ്യം കണ്ടാണ് ഹർജിക്കാരൻ സ്ഥാപനത്തെ സമീപിക്കുന്നത്. യുകെയിലേക്ക് പോകുന്നതിനായി സ്ഥാപനം 13.50 ലക്ഷം രൂപ ആവശ്യപ്പെട്ടിരുന്നു. അത്രയും തുക കയ്യിലില്ലെന്ന് അറിയിച്ചപ്പോൾ, ഹർജിക്കാരന്റെ വസ്തു ഈടുവെച്ച് മൂന്നാം പ്രതിയായ റജി ഫിലിപ്പിന്റെ പേരിൽ കെ.എസ്.എഫ്.ഇ മല്ലപ്പള്ളി ബ്രാഞ്ചിൽ നിന്ന് ചിട്ടി ലോൺ എടുത്തുതരാമെന്നും ജോലി കിട്ടിയ ശേഷം ഇ.എം.ഐ ആയി അടച്ചാൽ മതിയെന്നും വിശ്വസിപ്പിച്ചു.എന്നാൽ ഹർജിക്കാരൻ അറിയാതെ ഇയാളുടെ വസ്തുവിന്മേൽ 20 ലക്ഷം രൂപയാണ് ലോൺ എടുത്തത്. പിന്നീട് വ്യാജ ഇന്റർവ്യൂ നടത്തി പാസ്സായതായി അറിയിച്ചെങ്കിലും തുടർന്ന് ഫോൺ വിളികൾക്കൊന്നും മറുപടി നൽകിയില്ല. സ്ഥാപനം തട്ടിപ്പ് നടത്തുകയാണെന്ന് മനസ്സിലാക്കി പത്തനംതിട്ട ഡിവൈ.എസ്.പിക്ക് പരാതി നൽകിയപ്പോൾ ലോൺ അടച്ചുതീർത്ത് ആധാരം തിരികെ നൽകാമെന്ന് സമ്മതിച്ചെങ്കിലും തുകയോ ആധാരമോ തിരികെ നൽകാൻ ഇവർ തയ്യാറായില്ല. കേസിൽ കമ്മീഷൻ അയച്ച നോട്ടീസ് കൈപ്പറ്റിയിട്ടും എതിർകക്ഷികൾ ആരും ഹാജരായില്ല. തുടർന്ന് ഹർജിക്കാരന്റെ മൊഴിയുടെയും ഹാജരാക്കിയ രേഖകളുടെയും അടിസ്ഥാനത്തിലാണ് കമ്മീഷൻ ഉത്തരവിട്ടത്.ഹർജിക്കാരന്റെ വസ്തു പണയം വെച്ച് സ്വന്തം ആവശ്യത്തിനായി ഉപയോഗിച്ച 18,89,000 രൂപയും, 50,000 രൂപ നഷ്ടപരിഹാരവും, 10,000 രൂപ കോടതി ചെലവും ഉൾപ്പെടെ ആകെ 19,49,000/- രൂപ പരാതിക്കാരന് നൽകാനാണ് വിധി. കമ്മീഷൻ പ്രസിഡന്റ് ബേബിച്ചൻ വെച്ചൂച്ചിറ, അംഗം നിഷാദ് തങ്കപ്പൻ എന്നിവർ ചേർന്നാണ് വിധി പ്രസ്താവിച്ചത്.
ശിശുദിനാഘോഷം; നവംബര്‍ 14ന് പത്തനംതിട്ട ജില്ലയില്‍ വിപുലമായി സംഘടിപ്പിക്കും
ജില്ലാ ശിശുക്ഷേമ സമിതിയുടെ നേതൃത്വത്തില്‍ സംഘടിപ്പിക്കുന്ന ശിശുദിനാഘോഷം ( വര്‍ണ്ണോല്‍സവം 2026) വിപുലമായി സംഘടിപ്പിക്കാന്‍ ജില്ലാ കലക്ടര്‍ എ. നിസാമുദീന്റെ അധ്യക്ഷതയില്‍ പമ്പ ഹാളില്‍ ചേര്‍ന്ന സംഘടകസമിതി യോഗം തീരുമാനിച്ചു. ജില്ലാ പഞ്ചായത്ത് പ്രസിഡന്റ് ദീനാമ്മ റോയി യോഗം ഉദ്ഘാടനം ചെയ്തു.
ജില്ലാതല മല്‍സരങ്ങള്‍ ഒക്ടോബര്‍ 31 ശനിയാഴ്ച പത്തനംതിട്ട മാര്‍ത്തോമ ഹയര്‍ സെക്കന്‍ഡറി സ്‌കൂളില്‍ നടക്കും. 31 ന് രാവിലെ 9.30 ന് പ്രസംഗം (മലയാളം , ഇംഗ്ലീഷ്), പദ്യപാരായണം (മലയാളം, ഇംഗ്ലീഷ്), ദേശഭക്തിഗാനം എന്നീ മല്‍സരങ്ങളും 31 ന് ഉച്ചയ്ക്ക് 1.30 മുതല്‍ കഥാരചന ( മലയാളം, ഇംഗ്ലീഷ് ), കവിതാ രചന ( മലയാളം, ഇംഗ്ലീഷ് ) എന്നീ മല്‍സരങ്ങളും നടക്കും.സര്‍ക്കാര്‍, എയ്ഡഡ്, അണ്‍ എയ്ഡഡ് സ്‌കൂളിലെ എല്‍.പി, യു .പി, എച്ച് .എസ് സ്‌കൂളുകളിലെ വിദ്യാര്‍ത്ഥികള്‍ക്ക് മല്‍സരങ്ങളില്‍ പങ്കെടുക്കാം. സ്‌കൂള്‍ തലങ്ങളില്‍ മല്‍സരിക്കുന്നവരുടെ പട്ടിക ഒക്ടോബര്‍ 24 ന് ലഭിക്കണം.
നവംബര്‍ 14ന് പത്തനംതിട്ടയില്‍ നടക്കുന്ന ശിശുദിന റാലിയില്‍ പത്തനംതിട്ട നഗര പ്രദേശത്തെ സകൂളുകളിലെ വിദ്യാര്‍ത്ഥികളാണ് പങ്കെടുക്കുന്നത്. രാവിലെ എട്ടിന് കലക്ട്രേറ്റ് അങ്കണത്തില്‍ നിന്ന് ആരംഭിക്കുന്ന ശിശുദിന റാലി പത്തനംതിട്ട ടൗണ്‍ ചുറ്റി പത്തനംതിട്ട മാര്‍ത്തോമാ ഹയര്‍ സെക്കന്‍ഡറി സ്‌കൂളില്‍ സമാപിക്കും. തുടര്‍ന്ന് പൊതു സമ്മേളനം നടക്കും. നഗരസഭ ചെയര്‍പേഴ്‌സണ്‍മാരായ സിന്ധു അനില്‍, എം ആര്‍ കൃഷ്ണകുമാരി, ജില്ല വിദ്യാഭ്യാസ ഡെപ്യൂട്ടി ഡയറ്കടര്‍ ഷീബ മുഹമ്മദ്, ശിശുക്ഷേമ സമിതി ജില്ല സെക്രട്ടറി ജി പൊന്നമ്മ, ശിശുക്ഷേമ സമിതി ജില്ല വൈസ് പ്രസിഡന്റ് ആര്‍ അജിത് കുമാര്‍ , ശിശുക്ഷേമ സമിതി ജില്ല ജോയിന്റ് സെക്രട്ടറി സലിം പി ചാക്കോ, ജില്ല ട്രഷറര്‍ എ ജി ദീപു, ജി രാജേഷ് കുമാര്‍, കലാനിലയം രാമചന്ദ്രന്‍നായര്‍, എ.ഇ.ഓമാര്‍, സര്‍ക്കാര്‍ ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു. ശിശുദിനാഘോഷത്തിന്റെ വിജയത്തിനായുള്ള സംഘടക സമിതിയും രൂപികരിച്ചു.
ജില്ല കലക്ടര്‍ എ നിസാമുദീന്‍ ( ചെയര്‍മാന്‍), ഷീബ മുഹമ്മദ് ( വൈസ് ചെയര്‍മാന്‍), ജി. പൊന്നമ്മ (ജനറല്‍ കണ്‍വീനര്‍), ജില്ലാ ഇന്‍ഫര്‍മേഷന്‍ ഓഫീസര്‍ കെ കെ ജയകുമാര്‍ (കണ്‍വീനര്‍) എന്നിവര്‍ ഭാരവാഹികളായി ജനറല്‍ കമ്മറ്റിയും ആര്‍ അജിത് കുമാര്‍ (ഫിനാന്‍സ് കണ്‍വീനര്‍), സിന്ധു അനില്‍ (ചെയര്‍പേഴ്‌സണ്‍ പ്രോഗ്രാം), സലിം പി ചാക്കോ ( കണ്‍വീനര്‍ പ്രോഗ്രാം ), കലാനിലയം രാമചന്ദ്രന്‍ നായര്‍ (പബ്‌ളിസിറ്റി ചെയര്‍മാന്‍ ), റ്റി രാജേഷ്‌കുമാര്‍ (പബ്‌ളിസിറ്റി കണ്‍വീനര്‍) ,ഡി.എസ്.ഒ (ചെയര്‍മാന്‍ ഫുഡ്) എ ജി ദീപു (കണ്‍വിനര്‍ ഫുഡ്), പത്തനംതിട്ട ഡി. വൈ എസ് പി ( ചെയര്‍മാന്‍ റാലി ) പത്തനംതിട്ട ഡി.ഇ.ഒ ജയകൃഷ്ണന്‍ (കണ്‍വീനര്‍ റാലി) എന്നിവര്‍ സബ് കമ്മറ്റി ഭാരവാഹികളായുള്ള 101 അംഗ ഏക്‌സിക്യൂട്ടിവിനെ യോഗം തിരഞ്ഞെടുത്തു. വിവരങ്ങള്‍ക്ക് 8547716844 നമ്പരില്‍ ബന്ധപ്പെടണം
അയിരൂര്‍ ഗ്രാമപഞ്ചായത്തില്‍ കരുത്ത്- വനിത അസ്ഥിമിത്ര ക്യാമ്പ് സംഘടിപ്പിച്ചു
റാന്നി അയിരൂര്‍ ഗ്രാമപഞ്ചായത്തിന്റെയും കാഞ്ഞീറ്റുകര സാമുഹികാരോഗ്യ കേന്ദ്രത്തിന്റെയും സംയുക്താഭിമുഖ്യത്തില്‍ കരുത്ത്- വനിത അസ്ഥിമിത്ര ക്യാമ്പും ബോധവല്‍ക്കരണവും സംഘടിപ്പിച്ചു. പരിപാടിയുടെ ഉദ്ഘാടനം കാഞ്ഞീറ്റുകര സാമൂഹകാരോഗ്യ കേന്ദ്രത്തില്‍ ബ്ലോക്ക് പഞ്ചായത്ത് പ്രസിഡന്റ് രാമചന്ദ്രന്‍ നായര്‍ നിര്‍വഹിച്ചു. അയിരൂര്‍ ഗ്രാമപഞ്ചായത്ത് പ്രസിഡന്റ് സുരേഷ് കുഴിവേലി ചടങ്ങില്‍ അധ്യക്ഷനായി. അസ്ഥിസാന്ദ്രത പരിശോധനയായ ബി.എം.ഡി സ്‌കാന്‍, വാതരോഗ നിര്‍ണയം, രക്തപരിശോധന, അസ്ഥിരോഗ വിദഗ്ധരുടെ പരിശോധന, സൗജന്യ മരുന്നു വിതരണം, ആര്‍ത്തവവിരാമവും ജീവിതശൈലിയും സംബന്ധിച്ച ബോധവല്‍ക്കരണം എന്നിവയാണ് ക്യാമ്പിലൂടെ നല്‍കുന്നത്. വാര്‍ഡ് ഒന്ന്, രണ്ട്, പതിനാല്, പതിനാറ് എന്നീ വാര്‍ഡുകളിലുള്ളവര്‍ക്കായി ഒക്ടോബര്‍ 22 ന് തടിയൂര്‍ വായനശാലയിലും, വാര്‍ഡ് മൂന്ന്, നാല്, അഞ്ച്, ആറ് എന്നിവര്‍ക്കായി 29 ന് പ്ലാങ്കമണ്‍ സബ്സെന്ററിലും, വാര്‍ഡ് ഏഴ്, എട്ട്, ഒന്‍പത്, പത്ത് എന്നിവര്‍ക്കായി നവംബര്‍ 12 ന് കോറ്റാത്തൂര്‍ സബ്സെന്ററിലും തുടര്‍ന്നുള്ള ക്യാമ്പുകള്‍ നടക്കും. ചടങ്ങില്‍ പഞ്ചായത്ത് വൈസ് പ്രസിഡന്റ് പ്രീത ബി നായര്‍, ആരോഗ്യ വിദ്യാഭ്യാസ സ്ഥിരം സമിതി ചെയര്‍പേഴ്‌സണ്‍ സാംകുട്ടി അയ്യകാവില്‍, വികസനകാര്യ സ്ഥിരം സമിതി ചെയര്‍പേഴ്‌സണ്‍ സന്തോഷ് ജോസഫ്, ബ്ലോക്ക് അംഗം അനുരാധ ശ്രീജിത്ത്, വാര്‍ഡ് അംഗങ്ങളായ ബോബന്‍ ടി ചാണ്ടി, അബിനു മത്തായി, രേണുക സജികുമാര്‍, ലിസി സാമൂവേല്‍, അമ്പിളി പ്രഭാകരന്‍ നായര്‍, ജില്ലാ മെഡിക്കല്‍ ഓഫീസര്‍ ഡോ. ജെ മണികണ്ഠന്‍, ആരോഗ്യ കേരളം ജില്ലാ പ്രോഗ്രാം മാനേജര്‍ ഡോ. ജിനു തോമസ്, ഡോ. രജനി കൃഷ്ണന്‍ നായര്‍, ഡോ. ജെയ്സണ്‍ തോമസ്, എന്നിവര്‍ പങ്കെടുത്തു.
റാന്നിയിൽ അടഞ്ഞുകിടക്കുന്ന ആശുപത്രിയിൽ മോഷണം നടത്തിയ ആളെ അറസ്റ്റ് ചെയ്തു
റാന്നിയിൽ പ്രവർത്തനരഹിതമായി കിടക്കുന്ന റാന്നി മേനാംതോട്ടം ആശുപത്രിയിൽ മോഷണം നടത്തി രക്ഷപ്പെടാൻ ശ്രമിച്ചയാളെ റാന്നി പോലീസ് അറസ്റ്റ് ചെയ്തു. കോട്ടയം പരിധിയിൽ മാടപ്പള്ളി പള്ളിപ്പറമ്പ് ഇളംകുന്നേൽ വീട്ടിൽ സിബി പി രാഘവൻ (56) ആണ് പിടിയിലായത്.ബുധനാഴ്ച ഉച്ചയ്ക്ക് 12 മണിയോടെയാണ് മോഷണം നടന്നത്. ഇപ്പോൾ പ്രവർത്തനമില്ലാതെ കിടക്കുന്ന റാന്നി മേനാംതോട്ടം ആശുപത്രിയുടെ കാഷ്വാലിറ്റി കെട്ടിടത്തിന്റെ പൂട്ടുപൊളിച്ച് അകത്തു കടന്ന പ്രതി ആശുപത്രിയിലെ വിവിധ ഇടങ്ങളിലെ പൈപ്പുകളിൽനിന്നായി 25 ടാപ്പുകളും 10 വാൽവുകളും ഇളക്കിയെടുത്തു. നാട്ടുകാർ വിവരം നൽകിയതനുസരിച്ച് സ്ഥലത്തെത്തിയ റാന്നി പോലീസ് മോഷ്ടാവിനെ സ്ഥലത്തുനിന്നും കസ്റ്റഡിയിൽ എടുത്തു. ഇയാളുടെ പക്കൽ നിന്നും മോഷണമുതലുകളും കൂടാതെ, മോഷണത്തിനായി ഉപയോഗിച്ച ചുറ്റിക , പ്ലെയർ മുതലായവയും കണ്ടെടുത്തു.
എസ് ഐ മാരായ ബിജു ബി.എസ്, അച്ചൻ കുഞ്ഞ് , സി പി ഒ മാരായ അനു , ജിബിൻ ദാസ് , ശില്പ എന്നിവർ അടങ്ങിയ സംഘമാണ് പ്രതിയെ അറസ്റ്റ് ചെയ്തത്. റാന്നി ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
ഓപ്പറേഷൻ തൂഫാൻ 2. 0 മയക്കുമരുന്ന് വില്പന സംഘത്തിലെ മുഖ്യ കണ്ണി അറസ്റ്റിലായി
മയക്കുമരുന്ന് വില്പന സംഘത്തിലെ മുഖ്യ കണ്ണി അറസ്റ്റിലായി
മാരക മയക്കുമരുന്ന് വിൽപ്പന സംഘാംഗത്തെ സാഹസിക നീക്കത്തിലൂടെ പന്തളം പോലീസ് പിടികൂടി. തിരുവനന്തപുരം കാട്ടാക്കട കള്ളിക്കാട്ട് പുത്തൻവീട്ടിൽ ഷഹാബുദ്ദീന്റെ മകൻ മുഹമ്മദ് അനസ് (29) നെ ആണ് പന്തളം പോലീസ് സ്പെഷ്യൽ ഇൻവെസ്റ്റിഗേഷൻ ടീം അറസ്റ്റ് ചെയ്തത്.ഈ വർഷം മെയ് മാസത്തിൽ വിൽപ്പനയ്ക്കായി എത്തിച്ച എം ഡി എം എ.യുമായി പറക്കോട് കോട്ടമുകൾ സ്വദേശികളായ മുഹമ്മദ് ഷാ, ഷംനാദ് എന്നിവരെ പിടികൂടിയിരുന്നു. തുടർന്നാണ് കേസിന്റെ ഗൗരവസ്വഭാവം കണക്കിലെടുത്ത് ജില്ലാ പോലീസ് മേധാവി ആർ ആനന്ദ് മയക്കുമരുന്ന് ശൃംഖലയിലെ എല്ലാ കണ്ണികളെയും പിടികൂടണമെന്ന് കർശന നിർദേശം നൽകുകയും അന്വേഷണ സംഘത്തിന് ആവശ്യമായ എല്ലാ പിന്തുണയും നൽകുകയുംചെയ്തു.തുടരന്വേഷണത്തിൽ കടയ്ക്കാട് സ്വദേശിനിയായ ഷെമീന ഖാനെയും അറസ്റ്റ് ചെയ്തിരുന്നു. ഇവരിൽ നിന്നും കിട്ടിയ വിവരത്തെ തുടർന്ന് രാജ്യാന്തര മയക്കുമരുന്ന് സംഘത്തിലെ പ്രധാനിയും ഈ കേസിലെ മുഖ്യപ്രതിയുമായ നൈജീരിയൻ സ്വദേശിയായ വിദേശ പൗരൻ സാമുവൽ ക്ലബ്സൻ വോക്കാഫോർ എന്നയാളെയും ഒരാഴ്ച ഡൽഹിയിൽ തമ്പടിച്ച് അതിസാഹസികമായി പന്തളം പോലീസ് പിടികൂടിയിരുന്നു. നൈജീരിയൻ പൗരന്റെ മയക്കുമരുന്ന് നിർമ്മാണ യൂണിറ്റ് അടക്കം പോലീസ് നശിപ്പിക്കുകയുംചെയ്തിരുന്നു.കേസിലെ പ്രതിയായ മുഹമ്മദ് ഷാക്ക് നൈജീരിയക്കാരൻ സാമുവലിനെ പരിചയപ്പെടുത്തി കൊടുത്തത് ഇപ്പോൾ പിടിയിലായഅനസ്ആയിരുന്നു.ബാംഗ്ലൂരിൽ യൂബർടാക്സിയുടെ മറവിൽ ലഹരി വില്പനയുടെ മുഖ്യ കാരിയറായിരുന്നു ഇയാൾ. പോലീസ് ഇവരെ പിടികൂടിയതറിഞ്ഞ് ആദ്യം ഡൽഹിയിലേക്കും തുടർന്ന് മണാലിയിലേക്കും ഒളിച്ചുകടന്ന അനസ് അടുത്തിടെയാണ് മടങ്ങിയെത്തിയത്. ഇയാൾ ഉപയോഗിച്ചിരുന്ന സിംകാർഡുകളും മൊബൈൽ ഫോണുകളും ഉപേക്ഷിച്ച് താൻ ഒരിക്കലും പിടിയിലാവുകയില്ല എന്ന അമിത ആത്മവിശ്വാസത്തിലായിരുന്നു ഇയാൾ .പന്തളം പോലീസിന്റെ ആറുമാസത്തെ ശ്രമകരമായ അന്വേഷണത്തിനൊടുവിലാണ് പന്തളം സർക്കിൾ ഇൻസ്പെക്ടർ സി ബാബു കുറുപ്പ്, എസ് ഐ എബിൻ പ്രസാദ്, എഎസ് ഐ മാരായ ബി ഷൈൻ,സുരേഷ് കുമാർ,പോലീസ് ഉദ്യോഗസ്ഥരായ എസ് അൻവർഷ , എസ് ഷൈൻ എന്നിവർ അടങ്ങിയ അന്വേഷണസംഘം വർക്കലയിൽ നിന്നും അതിസാഹസികമായി ഇയാളെ പിടികൂടിയത്. അറസ്റ്റിലായ പ്രതിയെ അടൂർ ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു .
ഓപ്പറേഷൻ തൂഫാൻ 2.0 പന്തളത്ത് എം ഡി എം എ യുമായി രണ്ട് യുവാക്കൾ അറസ്റ്റിലായി
ജില്ലാ പോലീസ് മേധാവിയുടെ നിയന്ത്രണത്തിലുള്ള ജില്ലാ ഡാൻസാഫ് ടീമിന്റെയും , പന്തളം പോലീസിന്റെയും സംയുക്ത നീക്കത്തിലാണ് തിങ്കളാഴ്ച രാത്രി 11 ഓടെ എം ഡി എം എയുമായി യുവാവ് പന്തളം പോലീസിന്റെ പിടിയിലാകുന്നത്. പോലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിൽ വടശ്ശേരിക്കര കുമരംപേരൂർ ഓം നിവാസിൽ സുജിത്ത് സോമൻ (39) ആണ് ആദ്യം പിടിയിലാകുന്നത്. ഇയാളുടെ വസ്ത്രങ്ങൾക്കിടയിൽ ഒളിപ്പിച്ച നിലയിൽ 8.609 ഗ്രാം എംഡി എം എയും പിടിച്ചെടുത്തു.പന്തളം മെഡിക്കൽ മിഷന് സമീപം മധുക്കൽ എന്ന സ്ഥലത്ത് നടത്തിയ വാഹന പരിശോധനക്കിടെ ആണ് ഇയാൾ പിടിയിലായത്. തുടർന്ന് നടത്തിയ അന്വേഷണത്തിൽ ഇയാൾക്ക് എംഡി എം എ നൽകിയ കരുനാഗപ്പള്ളി ചെറിയഴീക്കൽ പുത്തൻപുരയിൽ വീട്ടിൽ രമേശ് തങ്കക്കുട്ടൻ (33) എന്നയാളെ ചെറിയഴിക്കൽ എന്ന സ്ഥലത്തുനിന്നും കസ്റ്റഡിയിലെടുത്തു. പന്തളം സർക്കിൾ ഇൻസ്പെക്ടർ സി ബാബുക്കുറുപ്പ്, പത്തനംതിട്ട ഡാൻസാഫ് എസ് ഐ യു വിഷ്ണു , പന്തളം എസ് എച്ച് ഒ SI എബിൻ പ്രസാദ്, എസ് ഐ വിനോദ് കുമാർ സി വി , എ എസ് ഐപ്രസന്നൻ, പോലീസ് ഉദ്യോഗസ്ഥരായ എസ് അൻവർഷ , ഹരി,കൃഷ്ണലാൽ
ഡാൻസാഫ് സംഘാംഗങ്ങളായ ബിനു,സുജിത്ത്,മിഥുൻ ജോസ്,ഷെഫീഖ്,ജിതിൻ,അനൂപ് എന്നിവർ അടങ്ങിയ സംഘമാണ് സാഹസിക നീക്കത്തിലൂടെ പ്രതിയെ പിടികൂടിയത്. അടൂർ ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ രണ്ട് പ്രതികളെയും റിമാൻഡ് ചെയ്തു.
പുളിക്കീഴ് പോലീസ് സ്റ്റേഷനിൽ നിന്നും രക്ഷപ്പെട്ട പോക്സോ കേസ് പ്രതിയെ പിടികൂടി
പുളിക്കീഴ് പോലീസ് സ്റ്റേഷനിൽ കസ്റ്റഡിയിൽ നിന്ന് രക്ഷപ്പെട്ട പ്രതിയെയാണ് പ്രത്യേക അന്വേഷണസംഘം പിടികൂടിയത്. നാലു വയസ്സു മാത്രം പ്രായമുള്ള പെൺകുട്ടിയെ അതിക്രൂരമായി ലൈംഗികമായി പീഡിപ്പിച്ച പ്രതിയെ പുളിക്കീഴ് പോലീസ് പിടികൂടിയിരുന്നു.
നിരണം കിഴക്കുംഭാഗം ആശാൻ കുടി പുതുവേൽ
സജിത്ത് ( 32) ആണ് പോലീസിനെ വെട്ടിച്ച് ഒളിവിൽ കഴിയവേ പിടിയിലായത്.
സെപ്റ്റംബർ മാസം രണ്ടാമത്തെ ആഴ്ചയിലാണ് ഇയാൾ നാലു വയസ്സു മാത്രം പ്രായമുള്ള പെൺകുട്ടിയെ അതിക്രൂരമായി ലൈംഗികമായി ഉപദ്രവിക്കുകയും , വിവരം പുറത്തു പറഞ്ഞാൽ കൊല്ലുമെന്ന് ഭീഷണിപ്പെടുത്തുകയും ബീഡി കൊണ്ട് പൊള്ളിക്കുകയും , കമ്പുകൊണ്ട് പുറത്ത് അടിക്കുകയും മറ്റും ചെയ്തത്. പേടി കാരണം കുട്ടി വിവരം ആദ്യം പുറത്തു പറഞ്ഞില്ല എങ്കിലും കുട്ടിയുടെ ശരീരത്തെ മുറിവുകൾ ശ്രദ്ധയിൽപ്പെട്ട ബന്ധുക്കൾ വിവരം ചോദിച്ചതോടെ കുട്ടി പീഡന വിവരം വെളിപ്പെടുത്തുകയായിരുന്നു.
ഒക്ടോബർ 9 വെള്ളിയാഴ്ച കേസ് രജിസ്റ്റർ ചെയ്ത പുളിക്കീഴ് പോലീസ് തൊട്ടടുത്ത ദിവസം തന്നെ പ്രതിയെ പിടികൂടിയിരുന്നു. എന്നാൽ ശനിയാഴ്ച രാത്രി പ്രതി പോലീസ് കസ്റ്റഡിയിൽ നിന്ന് രക്ഷപ്പെട്ടിരുന്നതിനെതുടർന്ന് ജില്ലാ പോലീസ് മേധാവി ആർ ആനന്ദ് ന്റെ നിർദ്ദേശപ്രകാരം തിരുവല്ല ഡിവൈഎസ്പി സന്തോഷ് കുമാർ പി ആർ ന്റെ നേതൃത്വത്തിൽ ജില്ലാ പോലീസ് മേധാവിയുടെ പ്രത്യേക സ്ക്വാഡ് അംഗങ്ങളെ കൂടി ഉൾപ്പെടുത്തി പ്രത്യേക അന്വേഷണസംഘം രൂപീകരിച്ചു. രണ്ടുദിവസത്തെ ശ്രമകരമായ അന്വേഷണത്തിനൊടുവിൽ ഇര തോട് എന്ന സ്ഥലത്ത് ആശാൻകുടി കോളനിക്ക് സമീപം പ്രതിയുടെ സാന്നിധ്യം മനസ്സിലാക്കിയ പോലീസ് സംഘം അവിടെ എത്തി. എന്നാൽ പോലീസിനെ കണ്ട പ്രതി ഒളിച്ച് കണ്ടത്തിലെ ചെളിയിൽ ആഴ്ന്നു കിടന്നു. കണ്ടത്തിലെ ചെളിയിൽ പ്രതിയുടെ കാൽപ്പാടുകൾ പിന്തുടർന്ന പോലീസ് സംഘം വെള്ളത്തിൽ ഇറങ്ങി നീന്തി ചെന്നാണ് ചെളിയിൽ പൂണ്ടുകിടന്നിരുന്ന പ്രതിയെ പിടികൂടിയത്.
പുളിക്കീഴ് സബ് ഇൻസ്പെക്ടർ ധന്യ കെ എസ്, എ എസ് ഐ മാരായ അജികുമാർ, വിനോദ് എസ് സി പി ഒ മാരായ ജീവൻദാസ്, മനോജ് കുമാർ , രെജു, ആരോമൽ, സി പി ഒ മാരായ അനിൽകുമാർ, അരുൺ ദാസ്, രഞ്ജു കൃഷ്ണൻ, വിനീത്, രതീഷ്,ജസ്റ്റിൻ, ജിഷ്ണു,ധീരജ്, അതുൽ,നിതിൻ തോമസ്, രവി, ശ്രീജാ ഗോപിനാഥ് , ഗീതു എന്നിവരായിരുന്നു പ്രതിയെ പിടികൂടിയ പ്രത്യേക അന്വേഷണ സംഘത്തിൽ ഉണ്ടായിരുന്നത്.
പിടികൂടിയ പ്രതിയെ കൂടുതൽ ചോദ്യം ചെയ്യലിനായി തിരുവല്ല സർക്കിൾ ഓഫീസിലേക്ക് കൊണ്ടുപോയിട്ടുണ്ട്. ഇയാളെ റിമാൻഡ് അപേക്ഷ സഹിതം തിരുവല്ല ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കും.
ഓപ്പറേഷൻ തൂഫാൻ 2.0 തിരുവല്ല സ്വദേശിയായ യുവാവിന്റെ വീട്ടിലെ അടുക്കളയിൽ നിന്നും 3.858 കിലോഗ്രാം കഞ്ചാവ് പിടികൂടി
ഓപ്പറേഷൻ തൂഫാൻ 2.0
തിരുവല്ല സ്വദേശിയായ യുവാവിന്റെ വീട്ടിലെ അടുക്കളയിൽ നിന്നും 3.858 കിലോഗ്രാം കഞ്ചാവ് പിടികൂടി
തിരുവല്ലായിൽ ഓപ്പറേഷൻ തൂഫാൻ 2.0 യുടെ ഭാഗമായ പരിശോധനയിൽ തിരുവല്ല കുറ്റപ്പുഴ സ്വദേശിയായ യുവാവിന്റെ വീട്ടിൽ നിന്നും 3.858 കിലോഗ്രാം കഞ്ചാവ് പിടികൂടി.
തിരുവല്ല കുറ്റപ്പുഴ കോട്ടാലിൽ ചിറയിൽ വീട്ടിൽ സെബു (30) ൻ്റെ വീട്ടിൽ അടുക്കളയിൽ സ്ലാബിന് അടിയിലായി രണ്ട് ബക്കറ്റുകളിലായി ഒളിപ്പിച്ച നിലയിലായിരുന്നു കഞ്ചാവ്. ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ജില്ലാ ഡാൻസാഫ് ടീമും , തിരുവല്ല സർക്കിൾ ഇൻസ്പെക്ടർ ഗോപകുമാർ, സബ് ഇൻസ്പെക്ടർ,റിയാസ് റഹീം , എസ് ഐ ആര്യ മോൾ, എസ് സി പി ഒ സുശീൽ കുമാർ, സി പി ഒ മാരായ നിഥിൻ , മഹേഷ് , അരുൺ എന്നിവരും അടങ്ങിയ പോലീസ് സംഘമാണ് കഞ്ചാവ് കണ്ടെടുത്തത്. പോലീസ് എത്തുന്ന വിവരം മനസ്സിലാക്കിയ പ്രതി വീട്ടിൽ നിന്നും ഓടി രക്ഷപ്പെട്ടു. പ്രതിയെ എത്രയും വേഗം കണ്ടെത്തി നിയമത്തിനു മുന്നിൽ കൊണ്ടുവരുമെന്നും , ഇയാൾക്കെതിരെ തിരുവല്ല പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട് എന്നും തിരുവല്ല സർക്കിൾ ഇൻസ്പെക്ടർ പറഞ്ഞു.