പത്തനംതിട്ടയിൽ വീടുകൾ തോറും കയറിയിറങ്ങി ആയുർവേദ ഉൽപ്പന്നങ്ങൾ വിൽക്കുന്ന രണ്ട് യുവതികളെ പത്തനംതിട്ട കെ എസ് ആർ റ്റി സി ബസ്റ്റാൻഡിന് സമീപത്തു നിന്നും നിർബന്ധിച്ച് പെട്ടി ഓട്ടോറിക്ഷയിൽ കയറ്റിക്കൊണ്ടു പോവുകയും പല സ്ഥലങ്ങളിലും കറങ്ങി നടന്ന് യുവതികളെ പീഢിപ്പിക്കാൻ ശ്രമിക്കുകയും ചെയ്ത കേസിലെ പ്രതിയെ പത്തനംതിട്ട പോലീസ് അറസ്റ്റ് ചെയ്തു.
പുറമറ്റം വില്ലേജിൽ വെണ്ണിക്കുളം ചെറുവള്ളിപ്പാറ വീട്ടിൽ പ്രവീൺ ദാമോദരൻ (30) ആണ് പിടിയിലായത്. അടൂരിലെ സ്വകാര്യ സ്ഥാപനത്തിൽ നിന്നും ആയുർവേദ ഉത്പന്നങ്ങൾ വീടുകൾതോറും കയറിയിറങ്ങി വിൽപ്പന നടത്തുന്ന 18 വയസ്സുള്ള വയനാട് സ്വദേശിനിയും 20 വയസ്സുള്ള റാന്നി സ്വദേശിനിയും ആയ രണ്ട് യുവതികളെയാണ് ഇയാൾ നിർബന്ധിച്ച വാഹനത്തിൽ കയറ്റി കൊണ്ടുപോയതും പലയിടങ്ങളിലായി കറങ്ങി നടന്ന് പീഡിപ്പിക്കാൻ ശ്രമിച്ചതും. വാഹനം ഓടിക്കുന്നവരുടെ ഇടയ്ക്കിടെ ഇയാൾ ഒരു കത്തിയെടുത്ത് പെൺകുട്ടികളെ കാണിക്കുകയും ചെയ്തിരുന്നു. ഇക്കഴിഞ്ഞ ചൊവ്വാഴ്ച ഉച്ചയ്ക്ക് 12 മണിയോടെയാണ് ഇയാൾ യുവതികളെ നിർബന്ധിച്ച് വാഹനത്തിൽ കയറ്റിക്കൊണ്ട് പോയത്. വൈകുന്നേരം 4.45 മണിയോടെ തടിയൂർ എന്ന സ്ഥലത്ത് ഇറക്കിവിട്ടു. രാത്രിയോടെ പത്തനംതിട്ട വനിതാ പോലീസ് സ്റ്റേഷനിൽ എത്തി വിവരം പറഞ്ഞ യുവതികളിൽ ഒരാളുടെ മൊഴി സ്റ്റേഷൻ ഹൗസ് ഓഫീസർ ഷെമിമോൾ രേഖപ്പെടുത്തുകയും പത്തനംതിട്ട പോലീസ് സ്റ്റേഷനിൽ കേസ് രജിസ്റ്റർ ചെയ്യുകയും ആയിരുന്നു. ഉടൻതന്നെ അന്വേഷണം ആരംഭിച്ച പത്തനംതിട്ട സ്റ്റേഷനിലെ പോലീസ് സംഘം വളരെ വേഗം പ്രതിയെ കസ്റ്റഡിയിൽ എടുക്കുകയും ബുധനാഴ്ച രാത്രിയോടെ ഇയാളുടെ അറസ്റ്റ് രേഖപ്പെടുത്തുകയും ചെയ്തു.
പ്രതി മുൻപും സമാന രീതിയിലുള്ള കുറ്റകൃത്യം ചെയ്തിട്ടുള്ള ആളാണെന്ന് പത്തനംതിട്ട എസ്.എച്ച്.ഒ അരുൺ G പറഞ്ഞു ഇക്കഴിഞ്ഞ ഏപ്രിൽ മാസം പത്താം തീയതി അടൂർ ബസ്റ്റാൻഡിൽ വച്ച് പരിചയപ്പെട്ട വീടുകൾതോറും സാധനങ്ങൾ വിൽക്കുന്ന വടശ്ശേരിക്കര സ്വദേശിനിയായ 27കാരിയെയും ഇയാൾ ഇതേ രീതിയിൽ ഒരു ബൈക്കിൽ കയറ്റിക്കൊണ്ട് പോവുകയും പന്തളം കുളനട മാന്തുകയ്ക്ക് സമീപം വച്ച് പീഡിപ്പിക്കാൻ ശ്രമിക്കുകയും ഒരു പവനിൽ അധികം വരുന്ന സ്വർണമാല അപഹരിക്കുകയും ചെയ്തിരുന്നു. പ്രതി പ്രവീൺ ഈ കേസിൽ പന്തളം പോലീസിന്റെ പിടിയിൽ ആവുകയും റിമാൻഡിൽ കഴിയുകയും ചെയ്തിരുന്നു.പത്തനംതിട്ട സർക്കിൾ ഇൻസ്പെക്ടർ അരുൺ ജി , എസ് ഐ. അനീഷ് എബ്രഹാം എസ് എച്ച് ഒ, എസ് ഐ ബിനോജ് , എസ് ഐ ഹരി കൃഷ്ണൻ
സി പി ഒ മാരായ മിഥുൻ,അജയ് മോഹൻ എന്നിവർ അടങ്ങിയ പത്തനംതിട്ട സ്റ്റേഷനിലെ പോലീസ് സംഘമാണ് പ്രതിയെ അറസ്റ്റ് ചെയ്തത് പത്തനംതിട്ട ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു

കോഴഞ്ചേരി മാരാമണ്ണിൽ റിസോർട്ട് ജീവനക്കാരിയെ കുത്തി കൊലപ്പെടുത്തിയ പ്രതിയെ കോയിപ്രം പോലീസ് അറസ്റ്റു ചെയ്തു
പത്തനംതിട്ട കോഴഞ്ചേരി മാരാമൺ ഹോട്ടൽ ആൻഡ് റിസോർട്ട് ബാറിൽ റിസപ്ഷനിൽ ട്രെയിനിയായി ജോലി നോക്കി വന്നിരുന്ന ദിൻഷാ എസ് 21ണ് കൊല്ലപ്പെട്ടത്.,കൊല്ലം കുളത്തുപ്പുഴ: കുന്നുംപുറത്ത് കാഞ്ഞിരോട്ട് ദിൻഷാമൻസിൽ ഷാജി യുടെ മകളാണ് കൊല്ലപ്പെട്ട ദിൻഷാ. സംഭവത്തിലെ പ്രതിയായ കോഴഞ്ചേരി വെണ്ണപ്ര പാറയിൽ ജിത്തു 28 നെകോയിപ്രം പോലീസ് അറസ്റ്റു ചെയ്തു.ചൊവ്വാഴ്ച ഉച്ചക്ക് രണ്ടു മണിയോടെയാണ് നാടിനെ നടുക്കിയ കൊല നടന്നത്.
പെൺകുട്ടി ഈ മാസം പതിനൊന്നാം തീയതിയാണ് ഹോട്ടലിൽ റിസപ്ഷനിസ്റ്റ് ട്രെയിനി ആയി ജോലിക്ക് എത്തിയത്. പെൺകുട്ടിക്ക് പ്രതിയുമായി മുൻ പരിചയം ഉണ്ടായിരുന്നതായി പോലീസ് പറയുന്നു. ഹോട്ടലിൽ നിന്ന് പെൺകുട്ടിയെ സമീപത്തുള്ള ഒരു മരച്ചുവട്ടിലേക്ക് വിളിച്ചു വരുത്തിയ പ്രതി കുറച്ചുനേരം സംസാരിച്ച ശേഷം കയ്യിൽ കരുതിയിരുന്ന കത്തിയെടുത്ത് പെൺകുട്ടിയുടെ കഴുത്തിൽ പലതവണ കുത്തുകയും താഴെ വീണ പെൺകുട്ടിയെ വീണ്ടും കുത്തുകയും ആയിരുന്നു. പ്രതി കത്തി ഉപേക്ഷിച്ച ശേഷം ഹോട്ടൽ ജീവനക്കാർ ചേർന്ന് പ്രതിയെ തടഞ്ഞു വയ്ക്കുകയും പോലീസ് എത്തി കസ്റ്റഡിയിൽ എടുക്കുകയും ആയിരുന്നു. ദിൻഷയെ
കഴുത്തിൽ കുത്തി പരിക്കേൽപ്പിച്ചതിനെ തുടർന്ന് കോഴഞ്ചേരി മുത്തൂറ്റ് ആശുപത്രിയിൽ എത്തിച്ചെങ്കിലും ചികിത്സയിലിരിക്കെ മരണപ്പെട്ടു. കോയിപ്രം പോലീസ് പ്രതിയെ അറസ്റ്റ് ചെയ്തു കൊലപാതത്തിനുള്ള കാരണം പോലീസ് അന്വേഷിച്ചു വരുന്നു

കീഴ് വായ്പൂർ പോലീസ് സ്റ്റേഷൻ പരിധിയിൽ സ്റ്റോർ മുക്ക് എന്ന സ്ഥലത്ത് വെള്ളിയാമ്പള്ളിൽ വീട്ടിൽ ഏലിയാമ്മ എന്ന 70 വയസ്സായ സ്ത്രീയുടെ മാല പൊട്ടിച്ച് കടന്ന പ്രതിയെ മണിക്കൂറുകൾക്കുള്ളിൽ കീഴ് വായ്പൂർ പോലീസ് പിടികൂടി.
പെരുമ്പെട്ടി പോലീസ് സ്റ്റേഷൻ പരിധിയിൽ കുളത്തൂർ അതിരപ്ലാക്കൽ വീട്ടിൽ ജൂൻസ് (43) ണ് പിടിയിലായത്. ഞായറാഴ്ച ഉച്ചകഴിഞ്ഞ് 2 മണിയോടെയാണ് കേസിന് ആസ്പദമായ സംഭവമുണ്ടായത്. വീട്ടുമുറ്റത്ത് നിൽക്കുകയായിരുന്ന ഏലിയാമ്മയോട് സ്കൂട്ടറിന്റെ പെട്രോൾ തീർന്നുവെന്നും ഒരു കുപ്പി തരാമോ എന്നും ചോദിച്ചാണ് പ്രതി സമീപിച്ചത്. കുപ്പി എടുത്തു നൽകിയശേഷം വീട്ടിലേക്ക് കയറാൻ ഒരുങ്ങിയ ഏലിയാമ്മയുടെ മുഖത്തേക്ക് ഏതോ പൊടി വലിച്ചെറിഞ്ഞ ശേഷം കഴുത്തിൽ കടന്ന രണ്ടു പവന്റെ സ്വർണ്ണമാല വലിച്ചു പൊട്ടിച്ച് പ്രതി കടണുകളഞ്ഞു. ഉടൻതന്നെ ഇവർ കീഴ്വായ്പൂർ പോലീസ് സ്റ്റേഷനിൽ എത്തി പരാതി നൽകുകയും , കേസ് രജിസ്റ്റർ ചെയ്ത കീഴ്വായ്പൂർ പോലീസ് വളരെ വേഗം അന്വേഷണം നടത്തി പ്രതിയെ പിടികൂടുകയും ചെയ്തു. പ്രതിയുമായി തെളിവെടുപ്പ് നടത്തിയ കീഴ്വായ്പൂർ പോലീസിന് പ്രതിയുടെ വീട്ടിൽ നിന്ന് തന്നെ സ്കൂട്ടറിന്റെ സീറ്റിനിടയിൽ ഒളിപ്പിച്ചിരുന്ന സ്വർണമാല കണ്ടെടുക്കുന്നതിനും സാധിച്ചു.
കീഴ് വായ്പൂർ സർക്കിൾ ഇൻസ്പെക്ടർസുരേഷ് കുമാറിന്റെ നേതൃത്വത്തിൽ കീഴ്വായ്പൂർ
എസ് ഐ അനീഷ് റ്റി ,
സി പി ഒ മാരായ സന്തോഷ്‌ ,
വിഷ്ണു, അരുൺ ,
അഖിൻ എന്നിവ അടങ്ങിയ സംഘമാണ് മണിക്കൂറുകൾക്കുള്ളിൽ പ്രതിയെ അറസ്റ്റ് ചെയ്തത്. തിരുവല്ല ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പള്ളിയിൽനിന്ന് പ്രാർത്ഥന കഴിഞ്ഞ് മടങ്ങുകയായിരുന്ന 81 കാരിയായ വയോധികയുടെ സ്വർണ്ണമാല പൊട്ടിച്ച് കടന്ന പ്രതിയെ പത്തനംതിട്ട പോലീസ് അറസ്റ്റ് ചെയ്തു. റാന്നി പഴവങ്ങാടി സ്വദേശി കള്ളിക്കാട്ടിൽ വീട്ടിൽ ബിനു തോമസ് (35) ആണ് പിടിയിലായത്.
സെപ്റ്റംബർ 20ന് രാവിലെ പള്ളിയിൽ പോയി മടങ്ങി വരികയായിരുന്ന കുമ്പഴ സ്വദേശിനി കുഞ്ഞമ്മ എബ്രഹാം (81) എന്ന വയോധികയുടെ മാലയാണ് ഇയാൾ ഒരു ബൈക്കിൽ എത്തി പൊട്ടിച്ചത്. ഇവരുടെ പരാതിയിൽ കേസ് രജിസ്റ്റർ ചെയ്ത പത്തനംതിട്ട പോലീസ് വിശദമായ അന്വേഷണം നടത്തി . സിസിടിവി ദൃശ്യങ്ങൾ അടക്കം പരിശോധിച്ച് വളരെ വേഗം പ്രതിയിലേക്ക് എത്തുകയായിരുന്നു. മോഷ്ടിച്ചെടുത്ത ബൈക്കുകളിൽ കറങ്ങി നടന്ന് മാല പൊട്ടിക്കുകയാണ് ഇയാളുടെ രീതി. ഇത്തവണയും മാവേലിക്കരയിൽ നിന്ന് മോഷ്ടിച്ച ബൈക്കിലാണ് പ്രതി കുമ്പഴയിൽ എത്തി മാല പൊട്ടിച്ചത്. പ്രതിയെ അന്വേഷിച്ചു വരവേ റാന്നിയിൽ വച്ച് പ്രത്യേക അന്വേഷണസംഘം പിടികൂടുന്ന സമയത്ത് ഇയാൾ അക്രമാസക്തനാവുകയും വിഷം കഴിച്ചിട്ടുണ്ട് എന്ന് പറയുകയും ചെയ്തതിനാൽ റാന്നി താലൂക്ക് ആശുപത്രിയിലും തുടർന്ന് കോട്ടയം മെഡിക്കൽ കോളേജിലും ചികിത്സ നൽകിയ ശേഷമാണ് പ്രതിയുടെ അറസ്റ്റ് രേഖപ്പെടുത്തിയത്. ഇപ്പോൾ അറസ്റ്റിലായ ബിനു തോമസ് തിരുവനന്തപുരം ആലപ്പുഴ പത്തനംതിട്ട എന്നീ ജില്ലകളിലെ വിവിധ സ്റ്റേഷനുകളിലായി 17 ഓളം മോഷണ കേസുകളിൽ പ്രതിയാണ് എന്ന് പത്തനംതിട്ട സർക്കിൾ ഇൻസ്പെക്ടർ പറഞ്ഞു. നിരവധി തവണ ജയിൽ ശിക്ഷ അനുഭവിച്ചിട്ടുള്ള ആളാണ്. ആറന്മുളയിൽവച്ച് പ്രായമായ സ്ത്രീയുടെ മാല പൊട്ടിച്ച കേസിൽ റിമാൻഡിൽ കഴിയവേ ജാമ്യത്തിലിറങ്ങിയാണ് ഇപ്പോൾ കുമ്പഴയിലും സമാന കുറ്റകൃത്യം ആവർത്തിച്ചത്.
പത്തനംതിട്ട സർക്കിൾ ഇൻസ്പെക്ടർ ജി അരുണിന്റെ നേതൃത്വത്തിൽ എസ് ഐ മാരായ അനീഷ്‌ എബ്രഹാം , അജി കെ.ബി
എസ് സി പി മാരായ സന്ദീപ് , സുബിൻ , ഷിബു , വിജേഷ് അരുൺ , സി പി ഒ മാരായ അനീഷ്, മിഥുൻ, ജിത്ത്, നിസാം എന്നിവർ അടങ്ങിയ അന്വേഷണസംഘമാണ് പ്രതിയെ അറസ്റ്റ് ചെയ്തത് പത്തനംതിട്ട ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കേരള പോലീസ് നടപ്പാക്കി വരുന്നതും കേരള ജനത ഒന്നാകെ ഇരുകൈയും നീട്ടി സ്വീകരിച്ചതുമായ ലഹരി വിരുദ്ധ തീവ്ര യജ്ഞ പരിപാടിയായ ‘ഓപ്പറേഷൻ തൂഫാൻ’ രണ്ടാം ഘട്ടം നാളെ മുതൽ ആരംഭിക്കുന്നു. പദ്ധതിയുടെ രണ്ടാംഘട്ടത്തിൽ സംസ്ഥാനത്തെ മുഴുവൻ തദ്ദേശസ്വയംഭരണ സ്ഥാപനങ്ങളുമായി കൈകോർത്തുകൊണ്ടാണ് പോലീസ് ജനങ്ങളിലേക്ക് ഇറങ്ങുന്നത്. പദ്ധതിയുടെ രണ്ടാം ഘട്ടത്തിന്റെ സംസ്ഥാനതല ഉദ്ഘാടനം തിങ്കൾ രാവിലെ 11.25 ന് മലപ്പുറം വേങ്ങര മലബാർ കോളേജ് ഗ്രൗണ്ടിൽ ആഭ്യന്തരവകുപ്പ് മന്ത്രി . രമേശ് ചെന്നിത്തല നിർവഹിക്കും.
വ്യവസായ വകുപ്പ് മന്ത്രി പി. കെ. കുഞ്ഞാലിക്കുട്ടി അധ്യക്ഷത വഹിക്കും മന്ത്രിമാരായ കെ. എം. ഷാജി , എ. പി. അനിൽകുമാർ ശ്രീ. പി. കെ. ബഷീർ പി വിജയൻ (ADGP law & Order), ഡോ. ദിവ്യ എസ് അയ്യർ ഐ എ എസ് തൂഫാൻ പദ്ധതിയുടെ സംസ്ഥാന നോഡൽ ഓഫീസർ കൂടിയായ . പുട്ട വിമലാദിത്യ IPS (IG N/Zone) എന്നിവരും എം പിമാർ , എം എൽ എ മാർ, മറ്റ് തദ്ദേശസ്വയംഭരണ ജനപ്രതിനിധികൾ , വിവിധ വകുപ്പുകളുടെ ഉന്നത ഉദ്യോഗസ്ഥർ എന്നിവർ പങ്കെടുക്കുന്നു.

1. ഭാരതീയ കിസാൻ സംഘ് പത്തനംതിട്ട ജില്ലാ സമതിയോഗം കോഴഞ്ചേരി സംഘ കാര്യാലയത്തിൽ നടന്നു. യോഗത്തിൽ ജില്ലാ വൈസ് പ്രസിഡൻ്റ് സോമശേഖരൻ നായരുടെ അദ്ധ്യക്ഷതയിൽഭാരതീയ കിസാൻ സംഘ് സംസ്ഥാന സംഘടനാകാര്യദർശി പി.മുരളീധരൻ ഉദ്ഘാടനം ചെയ്തു.യോഗത്തിൽ സംസ്ഥാന സമതിയഗംങ്ങളായ എൻ ജി ഉണ്ണികൃഷ്ണൻ, സുരേഷ്, ജില്ലാ ട്രഷർ രാമചന്ദ്രൻ നായർ എന്നിവർ പ്രസംഗിച്ചു 

എല്ലാ മാസത്തിലെയും നാലാം ശനിയാഴ്ച പോലീസ് അഭിനന്ദന ദിനമായി ആചരിക്കുന്നതുമായി ബന്ധപ്പെട്ട് പത്തനംതിട്ട ജില്ലാ പോലീസ് മേധാവിയുടെ ചേമ്പറിൽ വച്ച് നടന്ന അനുമോദന യോഗത്തിൽ വച്ച് , ഓഗസ്റ്റ് മാസത്തിൽ മികച്ച പ്രവർത്തനം കാഴ്ചവച്ച പോലീസ് ഉദ്യോഗസ്ഥരെ ജില്ലാ പോലീസ് മേധാവി ആർ ആനന്ദ് പ്രശംസ പത്രം നൽകി ആദരിച്ചു.പന്തളം പോലീസ് സ്റ്റേഷനിലെ എഎസ്ഐ ഷൈൻ ബി, എ എസ് ഐ ദീപാ കുമാരി (ലെയ്സൺ ഓഫീസർ, പോക്സോ സ്പെഷ്യൽ കോർട്ട് അടൂർ) , സി പി ഒ അജിത്ത് കുമാർ എ.ആർ. എന്നിവർക്കാണ് ആദരവ് നൽകിയത്. 2025ൽ പന്തളം പോലീസ് സ്റ്റേഷനിൽ രജിസ്റ്റർ ചെയ്ത പോക്സോ കേസിലെ പ്രതിക്ക് 29 വർഷവും 9 മാസവും കഠിനതടവും 1,36,000 രൂപ പിഴയും ശിക്ഷ വാങ്ങി കൊടുക്കുന്നതിലും കേസിന്റെ വിചാരണ നടപടികൾ കോടതിയിൽ വിജയകരമായി പൂർത്തിയാക്കുന്നതിന് സഹായിച്ചതിനും ആണ് ഈ ഉദ്യോഗസ്ഥർക്ക് പ്രശംസ പത്രം നൽകിയത്. എന്ന് ജില്ലാ പോലീസ് മേധാവി പറഞ്ഞു. പന്തളം ഇൻസ്പെക്ടർ എസ് എച്ച് ഒ ആയിരുന്ന പ്രജീഷ് റ്റി.ഡി ആണ് കേസ് രജിസ്റ്റർ ചെയ്തതും അന്വേഷണം നടത്തി കുറ്റപത്രം സമർപ്പിച്ചതും. അദ്ദേഹം ഇപ്പോൾ മറ്റൊരു ജില്ലയിലാണ്.
കേസുകളുടെ അന്വേഷണം , വിചാരണ നടപടികളിൽ പ്രോസിക്യൂഷനെ സഹായിക്കൽ, മറ്റ് ജനോപകാരപ്രദമായ പ്രവർത്തനങ്ങൾ എന്നിവയിലൂടെ പോലീസ് സേനയുടെ അന്തസ്സ് വർദ്ധിപ്പിക്കുന്ന തരത്തിൽ പ്രവർത്തിക്കുന്ന പോലീസ് ഉദ്യോഗസ്ഥർക്ക് വരും മാസങ്ങളിലും നാലാം ശനിയാഴ്ച അഭിനന്ദനങ്ങൾ നൽകുമെന്നും ജില്ലാ പോലീസ് മേധാവി അറിയിച്ചു.

1. കൂടലിൽ കാറിൽ കടത്തിക്കൊണ്ടുവന്ന കഞ്ചാവും എം.ഡി.എം.എ യും ഹാഷിഷ് ഓയിലും പിടികൂടി 4 പേർ കസ്റ്റഡിയിലായി.പത്തനംതിട്ട കൂടൽ പോലീസ് സ്റ്റേഷൻ പരിധിയിൽ കലഞ്ഞൂർ വലിയ പള്ളിക്ക് സമീപം വെച്ച് അടൂർ പഴകുളം സ്വദേശി ലൈജു എന്ന ആളുടെ കാറിൽ നിന്നും കഞ്ചാവും എം ഡി എം എയും ഫാഷിഷ് ഓയിലും ഉൾപ്പെടെയുള്ള ലഹരി വസ്തുക്കൾ കണ്ടെത്തിയിട്ടുള്ളതാണ്. ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ജില്ലാ ഡാൻസാഫ് ടീമിന്റെയും അടൂർ സബ് ഡിവിഷൻ ഡാൻസാഫ് ടീമിന്റെയും സംയുക്ത പരിശോധനയിലാണ് ലഹരി മരുന്നുകൾ പിടികൂടിയത്. പിടികൂടിയ ലഹരിവസ്തുക്കൾ പോലീസ് പരിശോധിച്ചു വരികയാണ്.
   പ്രതികൾ സഞ്ചരിച്ചു വന്ന KL 31 V 5406 നമ്പർ ബൊലേനോ കാറിൽ വിൽപ്പനയ്ക്കായി കടത്താൻ ശ്രമിച്ച കടത്താൻ ശ്രമിച്ച ഗഞ്ചാവും എം ഡി എം എയും ഹാഷിഷ് ഓയിലും ആണ് പത്തനംതിട്ട ജില്ല ഡാൻസാഫ് ടീമും അടൂർ സബ് ഡിവിഷൻ ഡാൻസാഫ് ടീമും ചേർന്ന് പിടിച്ചെടുത്തിട്ടുള്ളത്.
   പ്രതികൾ സഞ്ചരിച്ചു വന്ന കാറിൽ നിന്ന് 400 ഗ്രാം കഞ്ചാവും 13. 508 ഗ്രാം MDMA യും 2.303 ഗ്രാം ഹാഷിഷ് ഓയിലും പിടിച്ചെടുത്തു.
   പഴകുളം പൊൻമന കിഴക്കേതിൽ ലൈജു( 31)നൂറനാട് പാലമേൽ കാവിൽ ശ്യാം (30)നൂറനാട് ഭവദാസൻ മുക്ക് വട്ടയത്തിനാൽ .അരുൺ (29)നൂറനാട് ശ്രീഹരി ഭവനം കിരൺ (26) എന്നി ആൾക്കാരുടെ കയ്യിൽ നിന്നുമാണ് നിരോധിത ലഹരി വസ്തുക്കൾ പിടിച്ചത്.
   ജില്ലാ പോലീസ് മേധാവി ആർആനന്ദ് ന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ജില്ലാ ഡാൻസാഫ് ടീമിന് നിർദ്ദേശം നൽകുകയുംകഴിഞ്ഞ ഒരു മാസത്തോളമായി ഈ സംഘത്തിന്റെ നീക്കങ്ങൾ നിരീക്ഷിച്ചു വരികയുമായിരുന്നു. സംഘത്തിലെ പ്രധാനി ലൈജു നിരവധി മയക്കുമരുന്ന് കേസുകളിൽ പ്രതിയും കാപ്പ കേസിൽ പ്രതിയും കേരളത്തിലും, ആന്ധ്രപ്രദേശിലും ഉൾപ്പെടെ മയക്കുമരുന്ന് കേസിൽ ശിക്ഷ അനുഭവിച്ചിട്ടുള്ള ആളുമാണ്. ഈ സംഘത്തിലെ മറ്റുള്ളവരും നിരവധി മയക്കുമരുന്ന് കേസുകളിൽ പ്രതികളാണ്. സംഘത്തലവൻ ലൈജു കൂടൽ പോലീസ് സ്റ്റേഷൻ പരിധിയിൽ കലഞ്ഞൂർ- കരിച്ചന്നൂർ എന്ന സ്ഥലത്ത് ഒരു വാടക വീട്ടിൽ കഴിഞ്ഞു വരികയായിരുന്നു. ഇവിടെനിന്നും കഞ്ചാവ് , എംഡി എം എ , ഹാഷിഷ് ഓയിൽ എന്നിവയുമായി പ്രതികൾ ഒരു കാറിൽ സഞ്ചരിക്കുന്നു എന്ന് മനസ്സിലാക്കിയ പോലീസ് സംഘം സ്ഥലത്തെത്തി പോലീസ് ജീപ്പ് കാറിനു കുറുകെ നിർത്തി വാഹനം തടഞ്ഞാണ് ഇവരെ പിടികൂടിയത്. പ്രതികൾ കാറിനുള്ളിൽ നിന്ന് പോലീസിന് നേരെ പെപ്പർ സ്പ്രേ ഉപയോഗിച്ച് ആക്രമണം നടത്തുകയും കാറിൽ ഉണ്ടായിരുന്ന ലഹരി വസ്തുക്കൾ ഉപേക്ഷിക്കാൻ ശ്രമം നടത്തുകയും ചെയ്തു. സാഹസികമായാണ് പോലീസ് സംഘം ഇവരെ കീഴ്പെടുത്തിയത്.
   ജില്ലാ പോലീസ് മേധാവിയുടെ നിർദ്ദേശാനുസരണം ജില്ലാ നായർക്കോട്ടിക് സെൽ ഡിവൈഎസ്പി റെജി എബ്രഹാം ഇൻസ്പെക്ടർ വിനോദ് എന്നിവരുടെ മേൽനോട്ടത്തിൽ പ്രവർത്തിച്ച സംഘത്തിൽ ജില്ലാ ഡാൻസാഫ് സബ് ഇൻസ്പെക്ടർമാരായ വിഷ്ണു യു വി , വിഷ്ണു അജയ് , അജികുമാർ , എന്നിവരും ഡാൻസാഫ് അംഗങ്ങളായ ബിനു ആർ , നിതിൻ ജോസ് , സുജിത്ത് , വിമൽ , ജിതിൻ, ഷെഫീഖ് , ശ്രീരാജ് എന്നിവരും അടൂർ സബ് ഡിവിഷൻ ഡാൻസാഫ് അംഗങ്ങളായ ഹരി അൻസിൽ സുമേഷ് രഞ്ജിത്ത് അനൂപ് എന്നിവരും ഉൾപ്പെട്ട സംഘമാണ് പ്രതികളെ പിടികൂടിയത് കൂടൽ പോലീസും ഡാൻസാഫും സ്ഥലത്ത് വെച്ച് പിടിച്ചെടുത്ത ലഹരി വസ്തുക്കളുടെ ശരിയായ തൂക്കം പരിശോധിച്ച് മഹസർ രേഖപ്പെടുത്തി. പ്രതികളെയും പിടിച്ചെടുത്ത ലഹരി വസ്തുക്കളും അൽപസമയത്തിനകം കൂടൽ പോലീസ് സ്റ്റേഷനിലേക്ക് മാറ്റും. കേസ് രജിസ്റ്റർ ചെയ്ത് അടക്കമുള്ള നടപടികൾ ഉടൻതന്നെ സ്വീകരിക്കും 

മല്ലപ്പള്ളി ഐ സി ഡി എസിന്റെ നേതൃത്വത്തിൽ ചങ്ങനാശ്ശേരി അസംപ്ഷൻ കോളജ് ഹോംസയൻസ് വിഭാഗവുമായി സഹകരിച്ച് നടത്തിയ “പോഷക മാസാചരണം 2026” ബ്ലോക്ക് പഞ്ചായത്ത് പ്രസിഡന്റ് ശോശാമ്മ തോമസ് ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡൻ്റ് എബി മേക്കരിങ്ങാട്ട് അധ്യക്ഷത വഹിച്ചു. ക്ഷേമകാര്യ സ്റ്റാൻഡിംഗ് കമ്മറ്റി ചെയർമാൻ മുഹമ്മദ് ഇസ്മായിൽ, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ലൈലാ അലക്സാണ്ടർ, വികസനകാര്യ സ്റ്റാൻഡിംഗ് കമ്മറ്റി ചെയർപേഴ്സൺ ലക്ഷ്മി അജിത്ത്‌, ബ്ലോക്ക് പഞ്ചായത്ത് അംഗങ്ങളായ രഞ്ജിനി അജിത്, ലിബിൻ ജോസഫ്, സി പി മാത്യു, റിമി ലിറ്റി, ഷിനി കെ പിള്ള, എ. ഡി ജോൺ, സി .പി മാത്യു , ധന്യാമോൾ ലാലി, ശിശുവികസന പദ്ധതി ഓഫീസർ രാജേശ്വരി ആർ തുടങ്ങിയവർ പ്രസംഗിച്ചു. മാസാചരണത്തിന്റെ ഭാഗമായി പോഷൺ റാലി, പോഷകാഹാര പ്രദർശനം, ബോധവൽകരണ ക്ലാസ്, കൗമാരക്കാർ, വയോജനങ്ങൾ, പുരുഷന്മാർ എന്നിവർക്കായി പാചക മത്സരങ്ങൾ എന്നിവ സംഘടിപ്പിച്ചു. അസംപ്ഷൻ കോളജ് MSc. FSMD കുട്ടികൾ ബോധവൽകരണ ക്ളാസ്സുകൾ നടത്തി

പേവിഷബാധ പ്രതിരോധം: സ്‌കൂള്‍ വിദ്യാര്‍ഥികള്‍ക്കായി പ്രസംഗ മത്സരം

ലോക പേവിഷബാധ ദിനാചരണത്തിന്റെ ഭാഗമായി ജില്ല മെഡിക്കല്‍ ഓഫീസ്, ആരോഗ്യ കേരളം പത്തനംതിട്ട എന്നിവയുടെ സംയുക്താഭിമുഖ്യത്തില്‍ ജില്ലയിലെ ഹൈസ്‌കൂള്‍, ഹയര്‍ സെക്കന്‍ഡറി വിദ്യാര്‍ഥികള്‍ക്ക്  ഒക്ടോബര്‍ മൂന്ന് രാവിലെ 10.30 ന് കലക്ടേറ്റ് പമ്പ കോണ്‍ഫറന്‍സ് ഹാളില്‍ പ്രസംഗമത്സരം സംഘടിപ്പിക്കുന്നു. മലയാളത്തിലാണ് മത്സരം. വിഷയം: ”പേവിഷബാധയില്ലാത്ത സമൂഹം നമ്മുടെ സ്വപ്നം, നമ്മുടെ ഉത്തരവാദിത്തം”. വിജയികള്‍ക്ക് ക്യാഷ്‌പ്രൈസും സര്‍ട്ടിഫിക്കറ്റും നല്‍കും. മത്സരത്തില്‍ പങ്കെടുക്കാന്‍ സെപ്റ്റംബര്‍ 30 ന് മുമ്പ് രജിസ്റ്റര്‍ ചെയ്യണം. ഫോണ്‍: 9496109189, 9633975603.

പഠനമുറി പദ്ധതിയിലേക്ക് പട്ടികജാതി വിദ്യാര്‍ഥികള്‍ക്ക് അപേക്ഷിക്കാം

പത്തനംതിട്ട നഗരസഭ പരിധിയില്‍ താമസിക്കുന്ന പട്ടികജാതി വിഭാഗത്തിലെ വിദ്യാര്‍ഥികള്‍ക്ക് പട്ടികജാതി വികസന വകുപ്പ് നടപ്പാക്കുന്ന പഠനമുറി പദ്ധതിയിലേക്ക് അപേക്ഷ ക്ഷണിച്ചു. സംസ്ഥാനത്തെ സര്‍ക്കാര്‍, എയ്ഡഡ്, ടെക്നിക്കല്‍, സ്‌പെഷ്യല്‍, കേന്ദ്രീയ വിദ്യാലയ സ്‌കൂളുകളില്‍ അഞ്ചു മുതല്‍ 12 വരെ ക്ലാസുകളില്‍ പഠിക്കുന്നവര്‍ക്ക് അപേക്ഷിക്കാം. ജാതി സര്‍ട്ടിഫിക്കറ്റ്, വരുമാന സര്‍ട്ടിഫിക്കറ്റ്, വിദ്യാര്‍ഥി പഠിക്കുന്ന സ്ഥാപനമേധാവിയുടെ സാക്ഷ്യപത്രം, നഗരസഭ/പഞ്ചായത്തില്‍ നിന്ന് പഠനമുറി ധനസഹായം ലഭിച്ചിട്ടില്ല എന്ന സാക്ഷ്യപത്രം, വീട് 1000 ചതുരശ്ര അടിയില്‍ താഴെയാണെന്ന സാക്ഷ്യപ്രതം, വീടിന്റെ ഉടമസ്ഥാവകാശം തെളിയിക്കുന്ന സാക്ഷ്യപത്രം, ഫോട്ടോ, ആധാര്‍ കാര്‍ഡ്, റേഷന്‍ കാര്‍ഡ്, ബാങ്ക് പാസ്ബുക്ക് എന്നിവയുടെ പകര്‍പ്പ് സഹിതം അപേക്ഷ ഒക്ടോബര്‍ 19 വൈകിട്ട് അഞ്ചിന് മുമ്പ് ഇലന്തൂര്‍ ബ്ലോക്ക് പട്ടികജാതി വികസന ഓഫീസര്‍, ഇലന്തൂര്‍ ബ്ലോക്ക്, നെല്ലിക്കാല പി ഒ എന്ന വിലാസത്തില്‍ സമര്‍പ്പിക്കണം. ഇ-മെയില്‍: scdoelanthoor42@gmail.com   . ഫോണ്‍: 8547630042.

ഗാന്ധിജയന്തി പ്രശ്‌നോത്തരി

കേരള ഖാദി ഗ്രാമവ്യവസായ ബോര്‍ഡ് ഗാന്ധിജയന്തിയുമായി ബന്ധപ്പെട്ട് ‘ഗാന്ധിജിയും ഖാദിയും സ്വാതന്ത്ര്യ സമരവും പൊതു വിജ്ഞാനവും’ വിഷയത്തില്‍ സംസ്ഥാനതലത്തില്‍ സംഘടിപ്പിക്കുന്ന പ്രശ്‌നോത്തരിക്ക് മുന്നോടിയായി ഹൈസ്‌കൂള്‍, ഹയര്‍ സെക്കന്‍ഡറി, സ്‌കൂള്‍ വിദ്യാര്‍ഥികള്‍ക്കായുള്ള ജില്ലാതല പ്രശ്‌നോത്തരി സെപ്റ്റംബര്‍ 28 രാവിലെ 11 ന് പത്തനംതിട്ട ജില്ല ഖാദി ഗ്രാമ വ്യവസായ ഓഫീസില്‍ നടത്തുന്നു. പ്രശ്‌നോത്തരിയില്‍ പങ്കെടുക്കുന്ന വിദ്യാര്‍ഥികള്‍ പേരു വിവരം സെപ്റ്റംബര്‍ 25 വൈകിട്ട് അഞ്ചിനു മുമ്പ് popta@kkvib.org യിലോ 0468 2362070 എന്ന ഫോണ്‍ നമ്പരിലോ രജിസ്റ്റര്‍ ചെയ്യണം. ജില്ലാതലത്തില്‍ ഒന്നും രണ്ടും മൂന്നും സ്ഥാനം നേടുന്ന വിജയികള്‍ക്ക് ക്യാഷ് അവാര്‍ഡ് നല്‍കും. ഒന്നും രണ്ടും സ്ഥാനം നേടുന്ന വിജയികള്‍ സംസ്ഥാനതല ക്വിസ് മത്സരത്തിലേക്ക് യോഗ്യത നേടും.

വാഹനം ആവശ്യമുണ്ട്

സാമൂഹിക നീതി വകുപ്പിന് കീഴിലുള്ള ജില്ല പ്രൊബേഷന്‍ ഓഫീസ് ആവശ്യങ്ങള്‍ക്ക് 2026-27 സാമ്പത്തിക വര്‍ഷം കരാര്‍ അടിസ്ഥാനത്തില്‍ ടാക്‌സി പെര്‍മിറ്റുള്ള ജീപ്പ്/കാര്‍ നല്‍കുന്നതിന് ടെന്‍ഡര്‍ ക്ഷണിച്ചു. വാഹനം 12 വര്‍ഷത്തില്‍ താഴെ കാലപ്പഴക്കം ഉള്ളതായിരിക്കണം. ടെന്‍ഡര്‍ സ്വീകരിക്കുന്ന അവസാന തീയതി ഒക്ടോബര്‍ 12 ഉച്ചയ്ക്ക് രണ്ട്. വിവരങ്ങള്‍ക്ക് പത്തനംതിട്ട കാപ്പില്‍ ആര്‍ക്കേഡ് ബില്‍ഡിംഗ്, ഡോക്ടേഴ്‌സ് ലൈന്‍ ഒന്നാം നിലയില്‍ പ്രവര്‍ത്തിക്കുന്ന ജില്ല പ്രൊബേഷന്‍ ഓഫീസുമായി ബന്ധപ്പെടണം. ഫോണ്‍: 04682 325242.

വനിത സ്വയംതൊഴില്‍ വായ്പ

സംസ്ഥാന വനിത വികസന കോര്‍പ്പറേഷന്‍ ജില്ലയില്‍ സ്ഥിര താമസക്കാരായ ന്യൂനപക്ഷ, പിന്നാക്ക, പട്ടികജാതി, പട്ടികവര്‍ഗ, പൊതുവിഭാഗത്തിലുള്ള വനിതകള്‍ക്ക് 30 ലക്ഷം രൂപ വരെ ആറ് മുതല്‍ എട്ട് ശതമാനം വരെ പലിശനിരക്കില്‍ നിബന്ധനകള്‍ക്ക് വിധേയമായി സ്വയം തൊഴില്‍ വായ്പയും പെണ്‍കുട്ടികള്‍ക്ക് വിദ്യാഭ്യാസ വായ്പയും നല്‍കുന്നു. 18 നും 55 നും ഇടയില്‍ പ്രായമുള്ള തൊഴില്‍ രഹിതരായ വനിതകള്‍ക്ക് സ്വയം തൊഴില്‍ ചെയ്യുന്നതിന് (വസ്തു/ഉദ്യോഗസ്ഥ ജാമ്യ വ്യവസ്ഥയില്‍) വായ്പ അനുവദിക്കുന്നു. www.kswdc.org യിലൂടെ അപേക്ഷിക്കാം. ഫോണ്‍: 8281552350.

റോഡരികിലെ ചെടികള്‍ നീക്കം ചെയ്യണം

കാല്‍നട യാത്രക്കാരുടെയും വാഹനയാത്രക്കാരുടെയും സുരക്ഷ കണക്കിലെടുത്ത് റോഡുകളുടെ വശങ്ങളില്‍ നട്ടിട്ടുള്ള ചെടികളും കൃഷിവിളകളും അടിയന്തിരമായി നീക്കം ചെയ്യണമെന്ന് കുളനട ഗ്രാമപഞ്ചായത്ത് സെക്രട്ടറി അറിയിച്ചു.

കുളനട ഗ്രാമപഞ്ചായത്തില്‍ സര്‍വകക്ഷിയോഗം ചേര്‍ന്നു

പാതയോരങ്ങളിലും പൊതുസ്ഥലങ്ങളിലും അനധികൃതമായി സ്ഥാപിക്കുന്ന ഫ്‌ളക്‌സുകള്‍, ബോര്‍ഡുകള്‍, ബാനറുകള്‍, കൊടിതോരണങ്ങള്‍ എന്നിവ നീക്കം ചെയ്യുന്നത് സംബന്ധിച്ച കേരള ഹൈക്കോടതി ഉത്തരവും സര്‍ക്കാര്‍ നിര്‍േദശങ്ങളും ചര്‍ച്ച ചെയ്യുന്നതിന് കുളനട ഗ്രാമപഞ്ചായത്ത് പ്രസിഡന്റ് പോള്‍ രാജന്റെ അധ്യക്ഷതയില്‍ സര്‍വകക്ഷി യോഗം ചേര്‍ന്നു. ഹൈക്കോടതിയുടെ ഉത്തരവും സര്‍ക്കാര്‍ നിര്‍ദേശങ്ങളും പഞ്ചായത്ത് സെക്രട്ടറി യോഗത്തില്‍ വിശദീകരിച്ചു. ഗ്രാമപഞ്ചായത്ത് വൈസ് പ്രസിഡന്റ് സാവിത്രി ഭദ്രന്‍, ആരോഗ്യവിദ്യാഭ്യാസ സ്ഥിരം സമിതി ചെയര്‍പേഴ്‌സണ്‍ സുജിത് കളീക്കല്‍, സെക്രട്ടറി പി. നന്ദകുമാര്‍ വിവിധ രാഷ്ട്രീയ പാര്‍ട്ടികള്‍, മതസ്ഥാപന- ക്ഷേത്ര ഭാരവാഹികള്‍, വ്യാപാരി-വ്യവസായി പ്രതിനിധികള്‍, സാമൂഹ്യ പ്രവര്‍ത്തകര്‍ തുടങ്ങിയവര്‍ യോഗത്തില്‍ പങ്കെടുത്തു.