ഓപ്പറേഷൻ തൂഫാനുമായി ബന്ധപ്പെട്ടുള്ള പരിശോധനകൾ ജില്ലയിലാകെ പുരോഗമിക്കവെ , ജില്ലയിലെ എം ഡി എം എ വിതരണ ശൃംഖലയിലെ ഒരാൾ കൂടി അറസ്റ്റിലായി. പെരുമ്പെട്ടി പോലീസ് സ്റ്റേഷൻ പരിധിയിൽ എഴുമറ്റൂർ എന്ന സ്ഥലത്ത് പുതുപ്പറമ്പിൽ വീട്ടിൽ സുമിത് മോഹൻ (37) ആണ് എറണാകുളത്തുനിന്നും പെരുമ്പെട്ടി പോലീസിന്റെ പിടിയിലായത്. ജൂൺ 28ന് എഴുമറ്റൂർ കൈമല എന്ന സ്ഥലത്ത് പുത്തൻപുരക്കൽ വീട്ടിൽ ഷർഫിൻ സെബാസ്റ്റ്യൻ (25) എന്നയാളെ 1.590 ഗ്രാം എം ഡി എം എ യുമായി വീട്ടിൽ നിന്നും പിടികൂടിയിരുന്നു.
ഇയാളുടെ വീട്ടിൽ നിന്നും എംഡി എം എ ഉപയോഗിക്കുന്നതിനുള്ള വിവിധ തരത്തിലുള്ള ഉപകരണങ്ങൾ പിടിച്ചെടുത്തിരുന്നു. കൂടാതെ ലഹരി വിരുദ്ധ സംഘടനയുടെ സംസ്ഥാന പ്രസിഡന്റ് എന്ന പേരിലുള്ള വ്യാജ ഐഡന്റിറ്റി കാർഡും കണ്ടെടുത്തു.
റിമാൻഡിൽ ആയ ഇയാളെ കസ്റ്റഡിയിൽ വാങ്ങി കൂടുതൽ വിശദമായി ചോദ്യം ചെയ്തതിൽ നിന്നാണ് ഈ കേസിലെ രണ്ടാം പ്രതിയും എംഡിഎംഎ വിൽപ്പനക്കാരനുമായ സുമിത് മോഹനനെ കുറിച്ചുള്ള സൂചനകൾ ലഭിക്കുന്നത്. തുടർന്ന് ഇയാൾക്കായുള്ള അന്വേഷണങ്ങൾ പോലീസ് വ്യാപിപ്പിച്ചു.
വിശദമായ അന്വേഷണത്തിൽ എറണാകുളം കളമശ്ശേരിയിൽ രണ്ടാംപ്രതി സുമിത് മോഹന്റെ സാന്നിധ്യം പോലീസ് മനസ്സിലാക്കുകയും കളമശ്ശേരി പോലീസിന്റെ കൂടി സഹായത്തോടെ ഇയാളെ അറസ്റ്റ് ചെയ്യുകയും ആയിരുന്നു. പെരുമ്പെട്ടി ഇൻസ്പെക്ടർ എസ് എച്ച് ഒ സനിൽകുമാർ റ്റി.എസ് ന്റെ നേതൃത്വത്തിൽ, എസ് ഐ മാരായ അനിരുദ്ധൻ , ഉണ്ണികൃഷ്ണൻ ,എഎസ് ഐ ഷെറീന അഹമ്മദ്, എസ് സി പി ഒ മാരായ രതീഷ് , സലാം കെ യൂസഫ് , സി പി ഒ മാരായ അഭിജിത്ത് , രാഹുൽ രവീന്ദ്രൻ എന്നിവർ അടങ്ങിയ അന്വേഷണ സംഘമാണ് കേസ് അന്വേഷിക്കുന്നത്.ജില്ലയിലേക്ക് എം ഡി എം എ അടക്കമുള്ള ലഹരി വസ്തുക്കൾ എത്തിക്കുന്ന വൻകിട കച്ചവടക്കാരെ കുറിച്ചുള്ള വിവരങ്ങൾ ശേഖരിക്കുന്നതിനായി ഇയാളെയും കസ്റ്റഡിയിൽ വാങ്ങി കൂടുതൽ വിശദമായ ചോദ്യം ചെയ്യലുകളും തെളിവെടുപ്പുകളും നടത്തുമെന്നും ഓപ്പറേഷൻ തൂഫാന്റെ ഭാഗമായുള്ള പരിശോധനകൾ കൂടുതൽ ശക്തമായി മുന്നോട്ടു കൊണ്ടുപോകുമെന്നും ജില്ലാ പോലീസ് മേധാവി അറിയിച്ചു.

ട്രെയിലർ ലോറികളിൽ നിന്നും പാർട്സുകൾ മോഷ്ടിച്ച് കടത്തിയ ചിറ്റാർ സീതത്തോട് ഗുരുനാഥൻ മണ്ണ് എന്ന സ്ഥലത്ത് താമരശ്ശേരിയിൽ വീട്ടിൽ വിവേക് ടി പി (29) , ചിറ്റാർ സീതത്തോട് 86 മൂട്ടപ്പടി എന്ന സ്ഥലത്ത് നല്ലാനിക്കുന്നത് വീട്ടിൽ നസീം നാസർ (21), ചിറ്റാർ സീസത്തോട് മൂന്നു കല്ല് കോർട്ട് പടി എന്ന സ്ഥലത്ത് ചേത്തയ്ക്ക പറമ്പിൽ വീട്ടിൽ താജുദ്ദീൻ മകൻ ആഷി എന്ന് വിളിക്കുന്ന ഹാഷിം (26) എന്നിവരെയാണ് ചിറ്റാർ പോലീസ് അറസ്റ്റ് ചെയ്തത്. നാഷണൽ ഹൈവേ ജോലികളുടെ കരാർ എടുത്തിരുന്ന ആലപ്പുഴ പാതിരപ്പള്ളി ആസ്ഥാനമായി പ്രവർത്തിക്കുന്ന അക്വാ ജിനോ ട്രേഡിങ് കമ്പനിയുടെ വക ട്രെയിലർ ലോറികളുടെ ബാറ്ററികൾ , ടയറുകൾ ഡിസ്കുകൾ എന്നിവ ഉൾപ്പെടെ 2,10,000 രൂപ വിലവരുന്ന പാർട്സുകളാണ് ഇവർ മോഷ്ടിച്ച് കടത്തിയത്. ഇവർ മൂന്നുപേരും ഇതേ കമ്പനിയിലെ ജോലിക്കാരാണ്.
മെയ് ഒന്നിനും ജൂൺ എട്ടിനും ഇടയിലുള്ള സമയത്താണ് ഇവർ ലോറികളുടെ പാർട്സുകൾ ഊരി മാറ്റി കടത്തിയത്. കമ്പനിയുടെ സൈറ്റ് മാനേജരായ രാജീവ് വിജയൻ ജൂൺ 20 ന് ചിറ്റാർ പോലീസിൽ പരാതി നൽകുകയും കേസ് രജിസ്റ്റർ ചെയ്യുകയും ചെയ്തു. തുടർന്ന് പരിസരത്തെ സിസിടിവി ദൃശ്യങ്ങളുടെയും , മറ്റ് ശാസ്ത്രീയ തെളിവുകളുടെയും അടിസ്ഥാനത്തിൽ പ്രതികളെ തിരിച്ചറിഞ്ഞ പോലീസ് ഇവർക്കായി അന്വേഷണം നടത്തി വരികയായിരുന്നു.വിവിധ സംഘങ്ങളായി തിരിഞ്ഞ് നടത്തിയ അന്വേഷണത്തിൽ രണ്ടാം പ്രതി നെസീമിനെയും മൂന്നാം പ്രതി ഹാഷിമിനെയും മൂന്നു കല്ല് എന്ന സ്ഥലത്ത് വെച്ച് അറസ്റ്റ് ചെയ്യുകയും , ഒന്നാം പ്രതിയായ വിവേകിനെ തിരുവനന്തപുരത്തുനിന്നും അറസ്റ്റ് ചെയ്യുകയും ചെയ്തു.
കേസിലെ ഒന്നാം പ്രതിയായ വിവേക് ചിറ്റാർ പോലീസ് സ്റ്റേഷനിലെ മറ്റ് മൂന്ന് ക്രിമിനൽ കേസുകളിലും പ്രതിയാണ് എന്ന് പോലീസ് അറിയിച്ചു.
ചിറ്റാർ ഇൻസ്പെക്ടർ എസ് എച്ച് ഒ അനീസ് എ , സബ് ഇൻസ്പെക്ടർമാരായ മനോജ് കുമാർ പി പി, അനിൽകുമാർ ബി , പോലീസ് ഉദ്യോഗസ്ഥരായ സുജിത്ത്, പ്രവീൺ , പ്രകാശ് , പ്രണവ് , സുമേഷ് , അഖിൽജിത്ത് എന്നിവർ അടങ്ങിയ സംഘമാണ് പ്രതികളെ അറസ്റ്റ് ചെയ്തത് കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു

താല്‍ക്കാലിക നിയമനം

കോഴഞ്ചേരി ജില്ല ആശുപത്രിയില്‍ ദിവസവേതന അടിസ്ഥാനത്തില്‍ ജീവനക്കാരെ നിയമിക്കുന്നു. കോഴഞ്ചേരി, മല്ലപ്പള്ളി, തിരുവല്ല താലൂക്കുകളിലെ സ്ഥിര താമസക്കാരായ ഉദ്യോഗാര്‍ഥികള്‍ സര്‍ട്ടിഫിക്കറ്റുകളുടെ അസല്‍ പകര്‍പ്പുമായി ജൂലൈ 20 ന് മുമ്പ് സൂപ്രണ്ടിന് അപേക്ഷ സമര്‍പ്പിക്കണം. ഫോണ്‍: 0468 2214108.

തസ്തിക, യോഗ്യത, ഉയര്‍ന്ന പ്രായപരിധി ക്രമത്തില്‍
 
ലിഫ്റ്റ് ഓപ്പറേറ്റര്‍ – 10-ാം ക്ലാസ്, ലിഫ്റ്റ് ഓപ്പറേറ്റര്‍ പ്രവൃത്തി പരിചയം – 40 വയസ്.

കാസ്പ് ഡാറ്റാ എന്‍ട്രി ഓപ്പറേറ്റര്‍ – ബിരുദം, (ഡി.സി.എ/പി.ജി.ഡി.സി.എ നിര്‍ബന്ധം)- 40.

എ സി മെക്കാനിക്ക് – 10-ാം ക്ലാസ്, റഫ്രിജറേഷന്‍ ആന്റ് എയര്‍ കണ്ടീഷനിംഗ് ട്രേഡ് സര്‍ട്ടിഫിക്കറ്റ് (ഐ.ടി.ഐ)- 40.

എസ് ടി പി ഓപ്പറേറ്റര്‍ – 10-ാം ക്ലാസ്, മെക്കാനിക്കല്‍/ഇലക്ട്രിക്കല്‍ ട്രേഡ് സര്‍ട്ടിഫിക്കറ്റ് (ഐ.ടി.ഐ)- 40.

സെക്യൂരിറ്റി – വിമുക്ത ഭടന്‍, വിമുക്ത ഭടന്മാരുടെ സൊസൈറ്റികള്‍/സംഘടനകളിലെ അംഗത്വ            സര്‍ട്ടിഫിക്കറ്റ്- 60.

ക്ലീനിംഗ് സ്റ്റാഫ് – ഏഴാം ക്ലാസ്- 40.

പാര്‍ട്ട് ടൈം സ്വീപ്പര്‍ – അഞ്ചാം ക്ലാസ്- 40.

ശ്രീ അയ്യങ്കാളി മെമ്മോറിയല്‍ സ്‌കോളര്‍ഷിപ്പ്

പട്ടികജാതി വിദ്യാര്‍ഥികള്‍ക്ക് ശ്രീ അയ്യങ്കാളി ടാലന്റ് സെര്‍ച്ച് ആന്റ് ഡെവലപ്‌മെന്റ് സ്‌കോളര്‍ഷിപ്പ്  ലഭിക്കുന്നതിന് ഇ-ഗ്രാന്റ്‌സ് പോര്‍ട്ടല്‍ 3.0 മുഖേന അപേക്ഷ ക്ഷണിച്ചു. അഞ്ച്, എട്ട് ക്ലാസുകളിലെ വിദ്യാര്‍ഥികള്‍ അപേക്ഷകളും അനുബന്ധ രേഖകളും സ്‌കൂളില്‍ നിന്നുള്ള സാക്ഷ്യപത്രം സഹിതം ബന്ധപ്പെട്ട പട്ടികജാതി വികസന ഓഫീസുകളില്‍ അപേക്ഷ സമര്‍പ്പിക്കണം. അവസാന തീയതി ജൂലൈ 15. അപേക്ഷ ഫോം ജില്ല/ബ്ലോക്ക്/നഗരസഭ പട്ടികജാതി വികസന ഓഫീസുകളില്‍ ലഭിക്കും. ഫോണ്‍: 0468 2322712, 0468 2223712.

ഉന്നത വിജയം നേടിയ വിദ്യാര്‍ഥികളെ ആദരിക്കുന്നു

ഈ വര്‍ഷം എസ്.എസ്.എല്‍.സി, പ്ലസ് ടു പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് നേടി ഉന്നത വിജയം കരസ്ഥമാക്കിയ ഇലന്തൂര്‍ ഗ്രാമപഞ്ചായത്തില്‍ സ്ഥിരതാമസക്കാരായ വിദ്യാര്‍ഥികളെ ആദരിക്കുന്നു. അര്‍ഹരായ വിദ്യാര്‍ഥികള്‍ മാര്‍ക്ക് പട്ടികയുടെ പകര്‍പ്പ് സഹിതം ജൂലൈ 20 ന് മുമ്പ് ഗ്രാമപഞ്ചായത്ത് കാര്യാലയത്തില്‍ അപേക്ഷ സമര്‍പ്പിക്കണം. ഫോണ്‍: 0468 2362037.

അപേക്ഷ തീയതി നീട്ടി

റാന്നി സര്‍ക്കാര്‍ ഐ.ടി.ഐയില്‍ എന്‍.സി.വി.റ്റി ട്രേഡുകളായ ഇലക്ട്രോണിക്‌സ് മെക്കാനിക്ക്, ഡ്രാഫ്റ്റ്‌സ്മാന്‍ സിവില്‍ എന്നിവയില്‍ പ്രവേശനത്തിന് അപേക്ഷിക്കാനുള്ള തീയതി ജൂലൈ 10 വൈകിട്ട് അഞ്ച് വരെ നീട്ടി. https://itiadmissions.kerala.gov.in ല്‍ അപേക്ഷ സമര്‍പ്പിക്കണം. വെബ്‌സൈറ്റ്: https://det.kerala.gov.in . ഫോണ്‍: 04735 296090.

ഡിപ്ലോമ ഇന്‍ ഹോസ്പിറ്റല്‍ മാനേജ്‌മെന്റ്

സ്റ്റേറ്റ് റിസോഴ്സ് സെന്റര്‍ എസ്.ആര്‍.സി കമ്മ്യൂണിറ്റി കോളജില്‍ ആരംഭിക്കുന്ന ഡിപ്ലോമ ഇന്‍ ഹോസ്പിറ്റല്‍ മാനേജ്‌മെന്റ് പ്രോഗ്രാമിന് അപേക്ഷ ക്ഷണിച്ചു. ഒരു വര്‍ഷമാണ് കാലാവധി. പ്ലസ് ടു യോഗ്യതയുള്ളവര്‍ക്ക് അപേക്ഷിക്കാം. അവസാന തീയതി ജൂലൈ 15. വെബ്‌സൈറ്റ്: www.srccc.in . ഫോണ്‍: 0471 2570471, 9846033009.

റാന്നി താലൂക്ക് ലൈബ്രറി കൗണ്‍സില്‍, മുണ്ടപ്പുഴ ടാഗോര്‍ ഗ്രന്ഥശാല,എം.എസ് ഹയര്‍ സെക്കന്‍ഡറി സ്കൂളിന്‍റെയും സംയുക്ത ആഭിമുഖ്യത്തില്‍ താലൂക്ക് തല വായനപക്ഷാചരണത്തിന്‍റെ സമാപനവും ഐ.വി ദാസ് അനുസ്മരണവും നടത്തി.ജൂണ്‍ 19 മുതല്‍ താലൂക്കിലെ വിവിധ ലൈബ്രറികളിലും സ്കൂളുകളിലും നടത്തിവന്ന പരിപാടികള്‍ക്കാണ് സമാപനമായത്.
ജില്ലാ പഞ്ചായത്ത് ക്ഷേമകാര്യ സ്റ്റാന്‍ഡിംങ് കമ്മറ്റി ചെയര്‍പേഴ്സണ്‍ ജൂലി സാബു ഉദ്ഘാടനം നിര്‍വ്വഹിച്ചു.താലൂക്ക് ലൈബ്രറി കൗണ്‍സില്‍ പ്രസിഡന്‍റ് എം.വി പ്രസന്നകുമാര്‍ അധ്യക്ഷത വഹിച്ചു.സെക്രട്ടറി പ്രൊഫ. വി.ആര്‍ വിശ്വനാഥന്‍ നായര്‍ ഐ.വി ദാസ് അനുസ്മരണം നടത്തി.റാന്നി ഗ്രാമ പഞ്ചായത്ത് പ്രസിഡന്‍റ് ശശികല രാജശേഖരന്‍ മുഖ്യപ്രഭാക്ഷണം നടത്തി.എം.എസ് സ്കൂള്‍ പ്രിന്‍സിപ്പല്‍ സ്മിജു ജേക്കബ്,പ്രഥമധ്യാപിക സിംല എബ്രഹാം,വാര്‍ഡംഗം സാബു പി.എബ്രഹാം,കവി. പി ചന്ദ്രമോഹന്‍,ബിനോയ് കുറിയാക്കോസ്,കെ.വി റെജി,കാര്‍ലിന്‍ ആന്‍ രഞ്ജിത്ത്,ആല്‍ഫി പ്രകാശ് എന്നിവര്‍ പ്രസംഗിച്ചു.

മല്ലപ്പള്ളി ബ്ലോക്ക് പഞ്ചായത്ത് പദ്ധതിയിൽ ഉൾപ്പെടുത്തി നടത്തിയ ഡ്രൈ സ്കൂട്ടർ വിതരണം അഡ്വ. വർഗീസ് മാമൻ എംഎൽഎ ഉദ്ഘാടനം ചെയ്തു, ബ്ലോക്ക് പഞ്ചായത്ത് പ്രസിഡന്റ് ശോശാമ്മ തോമസ് അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്റ് എബി മേക്കരിങ്ങാട്ട് മുഖ്യപ്രഭാഷണം നടത്തി. ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ ടി എ എം ഇസ്മായിൽ, വികസനകാര്യ സ്റ്റാൻഡിങ് കമ്മിറ്റി ചെയർപേഴ്സൺ ലക്ഷ്മി അജിത്ത്, ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ലൈല അലക്സാണ്ടർ, മല്ലപ്പള്ളി ഗ്രാമപഞ്ചായത്ത് പ്രസിഡന്റ് കെ. ജി. സാബു, ബ്ലോക്ക് പഞ്ചായത്ത് അംഗങ്ങളായ എ. ഡി ജോൺ, സി. പി മാത്യു, ഷിനി കെ പിള്ള, കൃഷ്ണൻകുട്ടി മുള്ളൻങ്കുഴി , എം ഡി ദിനേശ് കുമാർ, ലിബിൻ ജോസഫ്, രഞ്ജിനി അജിത്, സി ഡി പി ഒ അംബിക അന്തർജനം തുടങ്ങിയവർ പ്രസംഗിച്ചു.

വാഹനം ഇടിച്ച് നടപ്പാതയിലേക്ക് മറിഞ്ഞു വീണു കിടന്ന നടപ്പാതയിലെ കൈവരി രാത്രിയിൽ ആരോ കടത്തിക്കൊണ്ടുപോയി.പുനലൂർ-മൂവാറ്റുപുഴ സംസ്ഥാന പാതയിൽ പെരുമ്പുഴ ബസ് സ്റ്റാൻഡിന് സമീപം മഡോണ ഫാർമസിക്ക് മുൻവശത്തെ നടപ്പാതയിലെ സംരക്ഷണ വേലിതാണ് കടത്തിക്കൊണ്ടുപോയത്. ദിവസങ്ങൾക്ക് മുൻപ് വാഹനം ഇടിച്ച് നടപ്പാതയിലേക്ക് മറിഞ്ഞുവീണ ഇരുമ്പ് വേലിയാണ് അധികൃതർ പുനരുദ്ധാരണം നടത്തുന്നതിന് മുൻപായി അപ്രത്യക്ഷമായത്.റോഡരികിൽ തകർന്നു കിടന്ന ഭാരമേറിയ ഇരുമ്പ് വേലി രാത്രിയുടെ മറവിൽ ആസൂത്രിതമായാണ് മോഷ്‌ടിക്കപ്പെട്ടിരിക്കുന്നത്. കാൽനടയാത്രക്കാരുടെ സുരക്ഷയ്ക്കായി സ്ഥാപിച്ചിരുന്ന കൈവരി തകർന്നത് തന്നെ അപകടഭീഷണി ഉയർത്തിയിരുന്നു. ഇതിന് പിന്നാലെയാണ് പൊതുമുതൽ മോഷ്ടാക്കൾ കവർന്നത്.വ്യാപാര സ്ഥാപനങ്ങളും ജനത്തിരക്കുമുള്ള ഈ ഭാഗത്തുനിന്ന് രാത്രിയിൽ വേലി കടത്തിക്കൊണ്ടുപോയതിന് പിന്നിൽ ആക്രി കച്ചവടക്കാരോ സാമൂഹിക വിരുദ്ധരോ ആണെന്നാണ് സംശയം. സമീപത്തെ വ്യാപാര സ്ഥാപനങ്ങളിലെ സിസിടിവി ദൃശ്യങ്ങൾ പരിശോധിച്ചാൽ പ്രതികളെ കണ്ടെത്താനാകുമെന്നാണ് നാട്ടുകാർ പറയുന്നത്. പൊതുമുതൽ മോഷ്ടിച്ചവർക്കെതിരെ കർശന നടപടി സ്വീകരിക്കണമെന്നും, അപകടാവസ്ഥയിലായ നടപ്പാതയിൽ പുതിയ സുരക്ഷാവേലി എത്രയും വേഗം സ്ഥാപിക്കാൻ പൊതുമരാമത്ത് വകുപ്പ് തയ്യാറാകണമെന്നും ആവശ്യമുയർന്നിട്ടുണ്ട്.

തിങ്കളാഴ്ച വൈകിട്ട് 3 മണിയോടെ പന്തളം ചേരിക്കൽ ഭാഗത്ത് ചിത്രയുടെ കുടുംബവും അയൽവാസിയും തമ്മിലുള്ള വസ്തു സംബന്ധമായ തർക്കം പരിഹരിക്കുന്നതിനായി താലൂക്ക് സർവേയർ വസ്തു അളക്കുന്നതിനായി എത്തിയിരുന്നു. അയൽവാസിയുടെ വസ്തു അളന്ന് തിരിച്ച് സ്ഥാപിച്ച കല്ലുകൾ യുവതി പിഴുത് എറിഞ്ഞു.
താലൂക്ക് സർവേയറോടൊപ്പം ഡ്യൂട്ടിയിൽ ഉണ്ടായിരുന്ന പന്തളം പോലീസ് സ്റ്റേഷനിലെ വനിതാ പോലീസ് ഉദ്യോഗസ്ഥ സുനിയെ യുവതി ആക്രമിക്കുകയും, യൂണിഫോമിലും മുടിയിലും മറ്റും പിടിച്ചു വലിക്കുകയും, കാലിൽ തൊഴിക്കുകയും , ഡ്യൂട്ടി തടസ്സപ്പെടുത്തുകയും ചെയ്തു. പരിക്കേറ്റ വനിതാ പോലീസ് ഉദ്യോഗസ്ഥയെ ആശുപത്രിയിലേക്ക് മാറ്റി. തുടർന്ന് പന്തളം പോലീസ് സ്റ്റേഷനിൽ നിന്ന് സീനിയർ സിവിൽ പോലീസ് ഓഫീസർ ജലജയുടെ നേതൃത്വത്തിൽ കൂടുതൽ വനിതാ പോലീസ് ഉദ്യോഗസ്ഥർ എത്തിയാണ് യുവതിയെ കസ്റ്റഡിയിലെടുത്തത്.
ഡ്യൂട്ടിയിലുള്ള പോലീസ് ഉദ്യോഗസ്ഥയെ ആക്രമിച്ചതിനും ഡ്യൂട്ടി തടസ്സപ്പെടുത്തിയതിനും യുവതിക്കെതിരെ കേസ് രജിസ്റ്റർ ചെയ്തു. ഇവരെ കോടതിയിൽ ഹാജരാക്കുകയും റിമാൻഡ് ചെയ്തു.

അടൂരിൽ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിലെ പ്രതി ഏനാത്ത് വില്ലേജിൽ നെടുമൺ
ശ്യാം രാജ് ഭവനിൽ ശ്യാം രാജ് ( 32) നെ ആണ് അടൂർ ഫാസ്റ്റ് ട്രാക്ക് കോടതി ജഡ്ജ് മഞ്ജിത്ത് റ്റി. പോക്സോ വകുപ്പ് പ്രകാരം കുറ്റക്കാരൻ എന്ന് കണ്ടെത്തി 6 വർഷം കഠിന തടവിനും 30,000 രൂപ പിഴയും ശിക്ഷ വിധിച്ചത്.
2022 ഫെബ്രുവരി മാസം 9,12 തീയതികളിൽ പ്രതിയുടെ വീട്ടിൽ വച്ച് പെൺകുട്ടിയെ ശാരീരികമായി പീഡിപ്പിച്ചതിന് ഏനാത്ത് പോലീസ് സ്റ്റേഷൻ ഇൻസ്പെക്ടർ ആയിരുന്ന ആർ മനോജ് കുമാർ ആണ് എഫ്.ഐ.ആർ രജിസ്റ്റർ ചെയ്തതും, അന്വേഷണം പൂർത്തിയാക്കി ചാർജ് ഷീറ്റ് സമർപ്പിച്ചതും.
പ്രോസിക്യൂഷൻഭാഗത്ത് നിന്നും 11 സാക്ഷികളെ വിസ്തരിക്കുകയും 13 രേഖകൾ ഹാജരാക്കുകയും ചെയ്തു. പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ അഡ്വക്കേറ്റ് സ്മിത ജോൺ പി ഹാജരായി കോടതി നടപടികൾ കോർട്ട് ലൈസൻ ഓഫീസർ ദീപാ കുമാരി ഏകോപിപ്പിച്ചു. പ്രതി പിഴ തുക അടയ്ക്കുകയാണെങ്കിൽ അത് അതിജീവതയ്ക്ക് നൽകാൻ ജില്ലാ ലീഗൽ സർവീസ് അതോറിറ്റിക്ക് കോടതി നിർദ്ദേശവും നൽകിയിട്ടുണ്ട്.